Silahlı qrup saxlanıldı
Kuba hakimiyyəti ABŞ-da qeydiyyatdan keçmiş sürətli qayıqla ölkə ərazisinə daxil olmağa çalışan silahlı qrupun qarşısının alındığını açıqlayıb.
Kuba Daxili İşlər Nazirliyinin yaydığı məlumata görə, hadisə ölkənin Villa Klara vilayətinin Korralilyo bələdiyyəsinə bağlı Kayo Falkones adası yaxınlığında, “El Pino” kanalı ərazisində baş verib. Sahil mühafizəsi əməkdaşları ilə baş verən atışma nəticəsində 4 nəfər ölüb, 6 nəfər yaralanıb.
“Terror məqsədli sızma” iddiası
Nazirliyin bəyanatında qeyd olunur ki, saxlanılan şəxslər ölkəyə terror məqsədilə daxil olmağı planlaşdırdıqlarını etiraf ediblər. Əməliyyat zamanı hücum tüfəngləri, qısa lüləli silahlar, kustar üsulla hazırlanmış yanar maddələr, gülləkeçirməz jiletlər, optik nişangahlar və hərbi kamuflyaj geyimləri aşkarlanıb.
Rəsmi məlumata görə, saxlanılan 10 nəfərin hamısı ABŞ-da yaşayan Kuba vətəndaşlarıdır və bəziləri terrorla əlaqəli cinayətlər üzrə milli siyahılarda yer alıb.
Daxildə də şübhəli saxlanılıb
Kuba ərazisində həmin qrupun qarşılanmasını təmin etməli olduğu iddia edilən bir nəfər də saxlanılıb. Səlahiyyətli qurumlar hadisənin bütün təfərrüatlarının araşdırıldığını və istintaqın davam etdiyini bildirir.
Rəsmi Havana bu hadisəni ölkənin təhlükəsizliyinə yönəlmiş ciddi təhdid kimi qiymətləndirir. ABŞ tərəfi isə hələlik məsələ ilə bağlı açıqlama verməyib.
