Peskov: Rusiya siyasi və diplomatik həllə açıqdır
Kremlin sözçüsü Dmitri Peskov Moskvada jurnalistlərin suallarını cavablandırarkən bildirib ki, Rusiyanın məqsədi münaqişənin siyasi yollarla həllidir. ABŞ Dövlət katibi Marko Rubionun Rusiyanın barış istəmədiyi yönündəki açıqlamasına cavab verən Peskov bildirib:
“Bu fikirlə razılaşmırıq. Rusiya həqiqətən barış istəyir və Ukrayna məsələsinin siyasi-diplomatik yolla həllinə açıqdır.”
“Kiyev danışıqlar yolunu özü bağlayıb”
Peskovun sözlərinə görə, münaqişənin uzanmasının əsas səbəbi Ukraynanın dialoqa qapını bağlamasıdır:
“Kiyev rejimi danışıqlar qapısını bağlayıb. Buna görə də xüsusi hərbi əməliyyat davam edəcək. Bizim prioritetimiz təhlükəsizliyimizi təmin etmək, maraqlarımızı qorumaq və gələcək nəsillər üçün təhlükəsiz mühit yaratmaqdır.”
Peskov əlavə edib ki, Ukrayna “gec-tez” Moskva ilə danışıqlar masasına qayıdacaq.
ABŞ-ın mümkün nüvə sınağı açıqlamasına reaksiya
Kremlin sözçüsü, ABŞ Prezidenti Donald Trampın ölkəsinin “nüvə sınaqları”na başlaya biləcəyi ilə bağlı sözlərini də şərh edib. Onun sözlərinə görə, belə bir addım uzun müddətdir davam edən sınaq qadağasının pozulması deməkdir:
“Nüvə sınaqlarının bərpası uzun illərdir mövcud olan qadağanın dayandırılması anlamına gələr. Prezident Vladimir Putinin dəfələrlə bəyan etdiyi kimi, belə vəziyyətdə Rusiya vəziyyətə uyğun addımlar atacaq.”
