Kolumbiya İsraili ölkədən çıxardı
Kolumbiya Prezidenti Qustavo Petro, İsrailə qarşı ən sərt diplomatik addımını ataraq ölkədəki bütün israilli diplomatların qovulduğunu və azad ticarət sazişinin dərhal ləğv edildiyini açıqlayıb. Qərar, İsrailin Qəzzaya yardım aparan “Dözümlülük donanması”nı saxlaması və iki kolumbiyalı qadını beynəlxalq sularda əsir almasına cavab olaraq verilib.
Prezidentdən sərt bəyanat
Petro sosial şəbəkə hesabında bildirib ki, “iki kolumbiyalı qadının beynəlxalq sularda saxlanılması və onların Fələstinə humanitar yardım aparmasına mane olunması Netanyahu hökumətinin daha bir beynəlxalq cinayətidir.” Prezident həmçinin Xarici İşlər Nazirliyinə hüquqi iddiaların qaldırılması barədə göstəriş verib və beynəlxalq hüquqşünasları prosesə qoşulmağa çağırıb.
Diplomatik əlaqələr artıq kəsilmişdi
Xatırladaq ki, Kolumbiya 2024-cü ildə Qəzzadakı müharibəyə etiraz olaraq İsraillə diplomatik münasibətləri kəsmişdi. Bununla belə, ölkədə 4 nəfərlik məhdud konsulluq heyəti fəaliyyət göstərirdi. İndi isə bu heyət də ölkədən çıxarılır.
Xarici İşlər Nazirliyinin bəyanatı
Kolumbiya Xarici İşlər Nazirliyi hadisə ilə bağlı sərt bəyanat yayaraq, vətəndaşları Luna Barretto və Manuela Bedoyanın əsir alınmasını “qanunsuz adam oğurluğu” adlandırıb və onların dərhal azad edilməsini tələb edib. Nazirlik İspaniya, Braziliya, Türkiyə və Cənubi Afrikanı da daxil olmaqla bir sıra dövlətləri öz vətəndaşlarını qorumaq üçün təcili addımlar atmağa çağırıb.
Humanitar missiya vurğulandı
Bəyanatda “Dözümlülük donanması”nın məqsədinin Qəzzaya humanitar yardım çatdırmaq, fələstinlilərin ağır vəziyyətinə diqqət çəkmək və müharibənin dayandırılmasını tələb etmək olduğu qeyd olunub. Kolumbiya hökuməti heç bir halda mülki şəxslərin saxlanılmasını və ya humanitar missiyaların qarşısının alınmasını qəbul etməyəcəyini bildirib.
Beynəlxalq hüquqa çağırış
Kolumbiya hökuməti beynəlxalq hüquqa, çoxtərəfli diplomatiyaya və ədalət prinsiplərinə sadiq qaldığını vurğulayıb, Fələstin xalqı ilə həmrəyliyini bir daha təsdiqləyib.
