“SOCAR-AQŞ” MMC-nin keçmiş baş direktoru Ramin İsayev barəsində Bakı Ağır Cinayətlər Məhkəməsində gedən məhkəmə prosesi sentyabrın 8-də yekunlaşıb.
Məhkəmə qərarı ilə o, 54 milyon manatlıq yeyinti və digər cinayət əməllərinə görə 14 il müddətinə azadlıqdan məhrum edilib.
Hökmə əsasən, İsayev Cinayət Məcəlləsinin 179.4-cü (xüsusilə külli miqdarda mənimsəmə), 193-1.3.2-ci (cinayət yolu ilə əldə edilmiş əmlakın leqallaşdırılması), 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) və 313-cü (vəzifə saxtakarlığı) maddələri üzrə təqsirli bilinib.
Əmlak və pullar müsadirə edildi
Məhkəmə qərarı ilə İsayevin yaxınlarının adına rəsmiləşdirilmiş çoxsaylı daşınmaz əmlak və ondan götürülmüş milyonlarla dollar nağd pul dövlət nəfinə müsadirə olunub. Həmin əmlak və vəsait zərərçəkmiş qurumların mülki iddialarının ödənilməsinə yönəldiləcək.
Sənədlərdə “Sea Breeze”də villa, Bakının mərkəzində mənzillər və digər mülklər yer alır. Bu işdə “SOCAR-AQŞ”, “Abşeron Qazma” MMC və “Aqrarkredit” QSC zərərçəkmiş qismində tanınıb.
Yeyinti sxemləri: qohumlar, saxta şirkətlər
İttihama görə, Ramin İsayev qohum və tanışlarını formal işə qəbul edib, büdcədən onlara yüksək maaşlar yazdırıb. O, başqalarının adına şirkətlər yaradaraq tenderlərdə qalib elan edib və milyonlarla dövlət vəsaitini mənimsəyib.
Cinayət işində onun həyat yoldaşı, qardaşı, bacısının övladları və digər qohumlarının da adları keçir.
Türkiyədə “Ramin Hakan” kimi vətəndaşlıq
Məlum olub ki, İsayev vəzifədən azad olunduqdan sonra Türkiyəyə köçüb və orada “Ramin Hakan” adı ilə vətəndaşlıq alıb. İttihama əsasən, mənimsənilən milyonların bir hissəsi Türkiyədə daşınmaz əmlak alınmasına, digər hissəsi isə bank hesablarına köçürülüb.
O, həmçinin “SOCAR-AQŞ”ın hesablarından Harvard Universitetinə özbaşına ianə göndərməkdə də ittiham olunur.
Müdafiə mövqeyi
Ramin İsayev məhkəmədə özünü təqsirli bilmədiyini açıqlayıb. Onun sözlərinə görə, dövlət vəzifəsinə gəlməzdən əvvəl uğurlu biznes fəaliyyəti olub və aldığı əmlakları həmin gəlirlər hesabına əldə edib.
İsayev 2009–2020-ci illərdə “SOCAR-AQŞ”ın baş direktoru vəzifəsində çalışıb. Şirkət 2007-ci ildə SOCAR, “Nobel Energy” və “Abşeron Qazma” MMC tərəfindən təsis olunmuşdu.
