Anar Əsədli barəsində həbs qətimkan tədbiri seçildi
Bu gün, oktyabrın 24-də Bakı Ağır Cinayətlər Məhkəməsində fəaliyyəti dayandırılmış Azərbaycan Yüksəliş Partiyasının (AY Partiya) sabiq sədri Anar Əsədlinin məhkəmə prosesi keçirilib.
İclasda hakimi Elnur Nuriyev olub. Məlumata görə, məhkəmə zamanı iki zərərçəkən tərəf dəymiş ziyanın ödənilmədiyini əsas gətirərək Əsədlinin barəsində yenidən həbs qətimkan tədbirinin seçilməsini tələb edib.
Məhkəmə bu vəsatəti təmin edib və onun barəsində əvvəllər tətbiq edilən başqa yerə getməmək haqqında qətimkan tədbirini həbslə əvəz edib. Beləliklə, Anar Əsədli elə məhkəmə zalında həbs olunaraq istintaq təcridxanasına göndərilib.
Növbəti proses noyabrın 28-də
Məhkəmənin növbəti iclası noyabrın 28-nə təyin edilib. Qeyd edək ki, Anar Əsədli bundan öncə, 2023-cü ilin aprelin 21-də saxlanılmış, lakin həmin ilin iyulunda ev dustaqlığına buraxılmışdı.
Sonradan onun barəsində açılmış cinayət işinə xitam verilsə də, Baş Prokurorluğun qərarı ilə bu xitam ləğv edilərək istintaq yenidən başladılıb.
Dələduzluq ittihamı
Anar Əsədli dörd nəfərə qarşı dələduzluqda təqsirləndirilir. Zərərçəkmişlər arasında mərhum prezident Əbülfəz Elçibəyin sabiq köməkçisi Oqtay Qasımov da var.
Əsədli 2020-ci ilin dekabrın 6-da Azərbaycan Yüksəliş Partiyasının təsis qurultayında sədrlik postuna seçilmiş, partiya isə 2021-ci ilin oktyabrında dövlət qeydiyyatına alınmışdı.
Lakin partiya 2023-cü ilin iyunun 23-də fəaliyyətini dayandırdığını bəyan etmişdi. Həmin vaxtda Anar Əsədli artıq həbsdə idi.
Siyasi dairələrdə bu hadisə, keçmiş partiya sədrinin fəaliyyətinə dair istintaqın daha geniş şəkildə davam etdiriləcəyinə işarə kimi qiymətləndirilir.
