55 faiz ABŞ-ni təhlükə sayır
“Nanos Research” qrupunun Bloomberg üçün apardığı rəy sorğusuna əsasən, respondentlərin 55 faizi ABŞ-ni Kanadanın təhlükəsizliyi üçün ən böyük təhdid hesab edir.
Sorğuda iştirak edənlərin yalnız 15 faizi Çini əsas təhlükə kimi göstərib. Rusiya isə 14 faizlə üçüncü sırada qərarlaşıb.
Sorğu 31 yanvar – 4 fevral tarixləri arasında keçirilib və nəticələr Kanada ilə ABŞ arasında ictimai rəy səviyyəsində yaranmış məsafəni ortaya qoyub.
Trampın bəyanatları fonunda
Nəticələr ABŞ Prezidenti Donald Trumpın son dövrlərdə səsləndirdiyi bəyanatlar fonunda açıqlanıb. Tramp Qrenlandiya ilə bağlı iddiaları, NATO haqqında tənqidi mövqeyi və Kanadaya qarşı əlavə gömrük rüsumları tətbiq etmək niyyəti ilə çıxış etmişdi.
Bu açıqlamalar iki ölkə arasında siyasi və iqtisadi münasibətlərdə gərginlik yaradıb.
Ekspert rəyi
Ottava Universitetinin beynəlxalq münasibətlər üzrə professoru Roland Paris bildirib ki, sorğu nəticələri Kanadada formalaşan ümumi ictimai əhval-ruhiyyəni əks etdirir. Onun sözlərinə görə, bəzi kanadalılar ABŞ-yə səfər və Amerika məhsullarının boykotunu davam etdirir.
Paris qeyd edib ki, bəzi dairələr Trampın ritorikasını sərt danışıqlar strategiyası kimi qiymətləndirsə də, bu yanaşma Kanada-ABŞ münasibətlərinə ciddi zərər vurur.
Tarixi müttəfiqlər arasında məsafə
Kanada və ABŞ uzun illərdir yaxın müttəfiq və əsas ticarət tərəfdaşları kimi çıxış ediblər. Lakin son illərdə ticarət siyasəti və təhlükəsizlik məsələləri üzrə fikir ayrılıqları münasibətlərdə yeni dinamika yaradıb.
Sorğunun nəticələri göstərir ki, kanadalıların təhlükəsizliklə bağlı prioritetlərində ciddi dəyişiklik müşahidə olunur və ABŞ artıq bir hissə tərəfindən əsas risk kimi qəbul edilir.
