Məktəb və evdə qanlı hücum
Kanadanın Britiş Kolumbiya əyalətinin Tumbler Ridge bölgəsində məktəb və yaxınlıqdakı yaşayış evində silahlı hücum baş verib. CBC-nin Kanada Kral Atlı Polisi (RCMP) açıqlamasına istinadən verdiyi məlumata görə, hadisə nəticəsində azı 10 nəfər həyatını itirib, 27 nəfər yaralanıb.
Məktəbdə baş verən hücum zamanı 6 nəfər yerindəcə ölüb, daha bir nəfər isə xəstəxanaya aparılarkən yolda dünyasını dəyişib. Hücumla əlaqəli olduğu ehtimal edilən yaxınlıqdakı evdə daha 2 nəfərin meyiti tapılıb. Hücumçu olduğu bildirilən bir şəxs də ölü vəziyyətdə aşkarlanıb.
Yaralıların vəziyyəti
2 nəfərin vəziyyəti ağırdır
Rəsmi açıqlamada bildirilib ki, yaralılardan 2 nəfər ağır və ya həyati təhlükəli vəziyyətdə xəstəxanaya yerləşdirilib. Digər 25 nəfər isə həyati təhlükə daşımayan xəsarətlərlə yerli tibb mərkəzində müayinə olunur.
Məktəbdə olan təxminən 100 şagird və əməkdaşın hamısının təhlükəsiz şəkildə təxliyə edildiyi bildirilib.
Polis hücumçunun bölgədə telefonlara göndərilən xəbərdarlıq mesajında təsvir edilən “qəhvəyi saçlı, paltarlı qadın”la eyni şəxs olduğunu təsdiqləyib.
Məktəblər bağlandı
Hadisədən sonra Tumbler Ridge bölgəsində ibtidai və orta məktəblərin həftə sonunadək bağlanması qərara alınıb. Yerli hakimiyyət orqanları təhlükəsizlik tədbirlərinin gücləndirildiyini açıqlayıb.
Rəsmilərdən başsağlığı mesajları
Kanadanın Baş naziri Mark Carney sosial şəbəkə hesabında paylaşım edərək, hadisədən dərin kədər hissi keçirdiyini bildirib. O, həlak olanların ailələrinə başsağlığı verib və fövqəladə xidmət əməkdaşlarının cəsarətinə görə minnətdarlığını ifadə edib.
Britiş Kolumbiyanın Baş naziri David Eby isə hadisəni “faciə” adlandıraraq, bunun illərlə yaddaşlardan silinməyəcəyini vurğulayıb.
Tumbler Ridge bələdiyyə başçısı Darryl Krakowka baş verənləri “kütləvi silahlı hücum” kimi qiymətləndirib və icmanın birliyə ehtiyacı olduğunu bildirib.
Ölkə tarixində ikinci ən qanlı məktəb hücumu
Bu hadisə 1989-cu ilin dekabrında Monreal şəhərində “L’Ecole Polytechnique” məktəbində 14 nəfərin öldürüldüyü hücumdan sonra Kanada tarixində ikinci ən ölümcül məktəb hücumu kimi qeydə alınıb.
Təxminən 2 400 nəfər əhalisi olan Tumbler Ridge qəsəbəsi Rokki dağlarının ətəyində, ABŞ sərhədindən təxminən 680 kilometr aralıda yerləşir.
Hadisə ilə bağlı istintaq davam edir.
