İşğalçılar istintaq komissiyasının yaradılmasını istəyir
“Maariv” qəzetinin dərc etdiyi yeni ictimai rəy sorğusuna əsasən, işğalçıların 64 faizi 2023-cü ilin 7 oktyabrında baş verən hadisələri və həmin günkü təhlükəsizlik, eləcə də siyasi uğursuzluqları araşdırmaq üçün rəsmi istintaq komissiyasının yaradılmasını tələb edir.
Sorğu nəticələri göstərir ki, İsrail cəmiyyətində hökumətin həmin gün baş verənlərə reaksiyasına və sonrakı tədbirlərə qarşı narazılıq dərinləşir. Respondentlərin çoxu hesab edir ki, hadisələr zamanı ciddi koordinasiya və kəşfiyyat çatışmazlıqları olub.
Qəzza ilə bağlı beynəlxalq qüvvə narahatlıq doğurur
Eyni sorğuya görə, iştirakçıların 58 faizi beynəlxalq hərbi qüvvənin Qəzza zolağına yerləşdirilməsinin İsrailin “Həmas”a qarşı hərbi əməliyyatlarda sərbəstliyini məhdudlaşdıra biləcəyindən ehtiyat edir.
Bu narahatlıq ABŞ Dövlət katibi Marko Rubionun son açıqlamasından sonra daha da güclənib. O, bəyan edib ki, “Yaxın Şərqdən kənar bir neçə ölkə Qəzzada beynəlxalq qüvvəyə dəstək verməyə hazırdır”.
Fransa Xarici İşlər Nazirliyi də eyni mövqeni bölüşərək bildirib ki, “Paris, Vaşinqton və London BMT Təhlükəsizlik Şurasına Qəzzada Fələstin Muxtariyyətinin qüvvələrini dəstəkləyəcək beynəlxalq qüvvə yaradılması ilə bağlı təklif təqdim edəcək”.
İsraillilərin “Qəzza müharibəsi” ilə bağlı fikirləri bölünür
“Maariv”in əvvəlki sorğusu da İsraildəki ictimai rəyi aydın şəkildə göstərir. Həmin sorğunun nəticələrinə görə, israillilərin 46 faizi “İsrail”in Qəzza müharibəsində qismən qələbə qazandığını düşünür, yalnız 13 faiz isə tam qələbə əldə olunduğunu hesab edir.
Bununla yanaşı, 35 faiz respondent isə “İsrail”in bu müharibədə heç bir qələbə qazanmadığını deyib. Analitiklərə görə, bu göstəricilər İsrail cəmiyyətində hökumətə və ordu rəhbərliyinə inamın ciddi şəkildə sarsıldığını sübut edir.
Ekspertlər hesab edirlər ki, 7 Oktyabr hadisələrinin səbəbləri və nəticələrinin araşdırılması yalnız daxili siyasi məsələ deyil, həm də İsrailin gələcək təhlükəsizlik siyasəti üçün həlledici əhəmiyyət daşıyır.
