Son sutkada itkilər artıb
Qəzza Səhiyyə Nazirliyinin yaydığı yazılı açıqlamaya əsasən, sionist rejim ordusunun Qəzza zolağına yönəltdiyi hücumlar nəticəsində son 24 saat ərzində azı 3 fələstinlinin cəsədi xəstəxanalara çatdırılıb. Bildirilib ki, ölənlərdən biri bina uçqunu altında qalıb. Eyni vaxtda 13 yaralı tibbi yardım üçün xəstəxanalara yerləşdirilib.
Nazirlik əlavə edib ki, xilasetmə qrupları dağıntılar altından yeni cəsədlərin çıxarılmasını davam etdirir və itkilərin real sayı açıqlanan rəqəmlərdən daha çox ola bilər.
Atəşkəsə baxmayaraq hücumlar davam edir
Rəsmi məlumatlara görə, atəşkəsin qüvvəyə mindiyi vaxtdan sonra da sionist rejimin həyata keçirdiyi hücumlar nəticəsində 420 nəfər həyatını itirib, 1 184 nəfər yaralanıb. Bundan başqa, dağıdılmış binaların altından 684 nəfərin cəsədi çıxarılıb.
Səhiyyə Nazirliyi vurğulayıb ki, atəşkəs razılaşmasına baxmayaraq, Qəzza zolağının müxtəlif bölgələri demək olar ki, hər gün hava və artilleriya zərbələrinə məruz qalır.
Ümumi statistika
Açıqlamaya əsasən, İsrailin 2023-cü ilin oktyabr ayından etibarən Qəzzaya başladığı genişmiqyaslı hücumlar nəticəsində həlak olanların sayı 71 386 nəfərə yüksəlib. Yaralıların sayı isə 171 264 nəfər olaraq qeydə alınıb. Ölənlərin böyük hissəsini qadınlar və uşaqlar təşkil edir.
Atəşkəs və əsir mübadiləsi razılaşması
Xatırladaq ki, ABŞ prezidenti Donald Tramp oktyabrın 9-da Misirdə aparılan danışıqlar zamanı Sionist rejim və HƏMAS hərəkatının Qəzzada atəşkəs planının ilk mərhələsini təsdiqlədiyini açıqlamışdı. Misirdə imzalanan razılaşma İsrail hökumətinin təsdiqindən sonra oktyabrın 10-da qüvvəyə minib.
Razılaşmanın taleyi sual altındadır
Bununla belə, sionist rejim ordusu atəşkəs razılaşmasına baxmayaraq, müxtəlif iddialarla fələstinlilərə qarşı hücumları davam etdirir. Yerli mənbələr bildirirlər ki, bu vəziyyət humanitar böhranı daha da dərinləşdirir və bölgədə gərginliyi azaldacaq real mexanizmlərin hələ də tətbiq olunmadığını göstərir.
Qəzzada səhiyyə sistemi ağır yüklənmə altındadır, xəstəxanalar isə dərman və tibbi avadanlıq çatışmazlığı ilə üz-üzədir.
