Katzın açıqlaması beynəlxalq reaksiyalara səbəb oldu
Sionist rejimin müdafiə naziri İsrail Katz Qəzza zolağında atəşkəs qüvvəyə mindikdən sonra həyata keçirilən genişmiqyaslı dağıntılarla bağlı açıqlaması ilə ciddi müzakirələrə yol açıb. Nazir ABŞ mərkəzli X sosial şəbəkəsində paylaşım edərək, The New York Times qəzetinin dərc etdiyi peyk görüntülərinə əsaslanan araşdırmaya münasibət bildirib.
Qəzetin məlumatına görə, atəşkəsin 10 oktyabr tarixində qüvvəyə minməsinə baxmayaraq, sionist rejim ordusu Qəzza zolağında 2 min 500-dən çox binanı yerlə-yeksan edib, istixanalar və kənd təsərrüfatı sahələri məhv edilib. Katz bu məlumatlara istinad edərək sionist rejim əsgərlərini “gördükləri işlərə görə təbrik etdiyini” açıq şəkildə bəyan edib.
Atəşkəsdən sonra da hücumların davamı etiraf edildi
Nazir açıqlamasında sionist rejimin baş naziri Benyamin Netanyahunun göstərişi ilə atəşkəsdən sonra da Qəzza zolağına hücumların davam etdirildiyini etiraf edib. Katz iddia edib ki, hədəf alınan mülki obyektlərin altında tunellər mövcud olub və bu səbəbdən dağıntılar “təhlükəsizlik zərurəti” ilə həyata keçirilib.
O, eyni zamanda İsrailin atəşkəsə baxmayaraq hücumlarını davam etdirəcəyini bildirərək, ölkəsinin “yaxın və uzaq bütün təhdidlərə qarşı təhlükəsizliyini qorumaqda qərarlı olduğunu” iddia edib.
Peyk görüntüləri dağıntıların miqyasını üzə çıxardı
“The New York Times” qəzeti yanvarın 12-də dərc etdiyi materialda peyk görüntülərinin təhlilinə əsaslanaraq, atəşkəsdən sonra Qəzzada dağıdılan binaların yalnız əvvəlcədən zərər görmüş tikililərlə məhdudlaşmadığını vurğulayıb. Məlumata görə, döyüşlər zamanı qismən salamat qalmış bəzi məhəllələr də sonradan tamamilə dağıdılıb.
Araşdırmada qeyd olunub ki, dağıntıların böyük hissəsi sionist rejim ordusunun nəzarətində olan ərazilərdə baş verib, lakin ordunun geri çəkildiyi bölgələrdə də onlarla bina hədəfə alınıb.
Qəzzada humanitar fəlakət dərinləşir
2023-cü ilin oktyabrında başlayan və iki ildən artıq davam edən hücumlar nəticəsində 71 mindən çox fələstinli həyatını itirib, 171 mindən artıq insan yaralanıb. Mülki infrastrukturun təxminən 90 faizi dağıdılıb. Birləşmiş Millətlər Təşkilatı Qəzzanın yenidən bərpası üçün tələb olunan vəsaiti təxminən 70 milyard dollar həcmində qiymətləndirir.
Qəzzadakı hökumətin Media Ofisinin yanvarın 15-də yaydığı məlumata əsasən, sionist rejim atəşkəsin ilk mərhələsində 1244 pozuntuya yol verib. Bu pozuntular nəticəsində 1760 fələstinli ölüb, yaralanıb və ya saxlanılıb.
Hamasdan sərt bəyanat
Hamas hərəkatı Katzın Qəzza zolağında dağıntılarla öyünməsini beynəlxalq hüquq və humanitar normalara qarşı misli görünməmiş laqeydlik kimi qiymətləndirib. Hərəkatın sözçüsü Hazım Kasım bildirib ki, bu açıqlamalar Qəzzada baş verənlərin “soyqırım müharibəsi və etnik təmizləmə” olduğunu açıq şəkildə sübut edir və bütün işğal mexanizminin məsuliyyətə cəlb edilməsini zəruri edir.
