İsrailin Yedioth Ahronoth qəzeti yazır ki, Donald Trampın İrana qarşı sərt və müharibə yönlü ritorikasına baxmayaraq, onun əsas məqsədi hərbi hücum deyil, İranın müdafiə və regional imkanlarını məhdudlaşdıracaq bir razılaşmaya nail olmaqdır.
Qəzetin hərbi şərhçisi Alon Ben Yişay qeyd edib ki, ABŞ Prezidenti Donald Tramp ictimaiyyət qarşısında İrana təhdidlərini davam etdirir, eyni zamanda “maksimum təzyiq” siyasəti ilə Tehranın sərt Amerika şərtlərini ehtiva edən bir sazişi qəbul etməsinə çalışır.
Ben Yişay qiymətləndirməsində bildirib:
“Donald Trampın son 24 saat ərzində verdiyi açıqlamalardan açıq şəkildə görünür ki, o, hərbi hücumdan daha çox danışıqlara maraq göstərir. Tramp İranla aparılacaq mümkün danışıqların ballistik raket istehsalının məhdudlaşdırılmasını, nüvə proqramının dayandırılmasını və İranın ərəb dünyasındakı müttəfiqlərinə verdiyi dəstəyin sona çatdırılmasını əhatə etməsini istəyir”.
İsrailli analitik hesab edir ki, İranın bu təhdidlər qarşısında nümayiş etdirdiyi mövqe Tehranla Vaşinqton arasında əsas məsələlər üzrə ikitərəfli dialoqun yolunu açmağa yönəlmiş çətin və dolayı danışıqların davam etdiyini göstərir. Onun sözlərinə görə, bu prosesdə Səudiyyə Ərəbistanı və xüsusilə vəliəhd şahzadə Məhəmməd bin Salmanın vasitəçilik rolu diqqət çəkir.
Ben Yişay bildirib ki, hazırkı mərhələdə dolayı danışıqlar əsasən Oman, Qətər və Türkiyə kimi vasitəçilər üzərindən intensiv şəkildə aparılır. İran rəsmiləri də ABŞ-la dolayı müzakirələrin getdiyini təsdiqləyiblər.
Şərhində Trampın regiona göndərdiyi Amerika hərbi texnikasının əsas məqsədinin İran rəhbərliyini təzyiq altına almaq və danışıqlar masasına oturtmaq olduğunu vurğulayan Ben Yişay əlavə edib:
“Buna baxmayaraq, Tehran Amerika şərtləri əsasında aparılacaq danışıqlardan yayınır. Bunun əsas səbəblərindən biri belə bir addımın İranın daxili siyasətində zəiflik kimi qiymətləndirilməsi və bunun əhalinin yenidən küçələrə çıxmasına səbəb ola biləcək prosesləri tetikləməsi qorxusudur”.
İsrailli analitik sonda bildirib ki, ABŞ hərbi planlaşdırıcılarının qarşısında duran əsas problem İran daxilindəki həyati əhəmiyyətli hədəflər barədə dəqiq və etibarlı kəşfiyyat məlumatlarının toplanmasıdır. Ben Yişayın fikrincə, ABŞ-ın Yaxın Şərqdə nə atəş gücü, nə də dəqiq silah çatışmazlığı var; əsas çatışmayan məqam rejimin çöküşünü təmin edə biləcək hədəflər — o cümlədən mümkün sui-qəsdlər — barədə kifayət qədər məlumatın olmamasıdır.
