Rezervasiya saytına kiber müdaxilə
İspaniya polisi bahalı otel otaqlarını cəmi 1 sentə kirayələyən 20 yaşlı gənci saxlayıb. Məlumata görə, şübhəli şəxs bir otel rezervasiya platformasının ödəniş təsdiq sisteminə müdaxilə edərək gecəliyi min avroya qədər çatan otaqları faktiki olaraq pulsuz əldə edib.
Polis bildirib ki, gənc ödəniş sisteminə kiber hücum edərək məbləği dəyişdirib və sistemə yalnız 0,01 avro məbləğində ödəniş əmri daxil edib. İlkin mərhələdə əməliyyat normal təsdiqlənsə də, sonradan platforma tərəfindən otelə real məbləğ əvəzinə cəmi 0,01 avro köçürüldüyü aşkar olunub.
20 min avrodan çox borc
Şübhəli şəxs Madriddəki bahalı oteldə qaldığı zaman saxlanılıb. Onun müxtəlif hotellərdə qalması nəticəsində 20 min avrodan artıq borc topladığı iddia edilir. Bildirilir ki, təkcə son qalma müddəti normal şərtlərdə təxminən 4 min avroya başa gəlməli idi.
İstintaq dörd gün ərzində yekunlaşdırılıb. Maraqlı məqam isə odur ki, şübhəli rezervasiyaları edərkən öz real kimliyindən istifadə edib.
Digər hotellərdə də eyni üsul
Polis araşdırması zamanı müəyyən olunub ki, saxlanılan şəxs digər hotellərdə də eyni üsuldan istifadə edib. O, qalma müddətində minibar məhsullarından və əlavə xidmətlərdən yararlanaraq ödəniş etmədən obyekti tərk etməyə cəhd göstərib.
Hüquq-mühafizə orqanları bildiriblər ki, bu metod ölkədə ilk dəfə qeydə alınıb və hazırda digər mümkün hallarla bağlı araşdırmalar davam etdirilir.
Əvvəl də oxşar hadisə olub
Məlumata görə, şübhəli daha əvvəl Kanar adalarında da oxşar cinayət törədib və bahalı oteldə qaldığı vaxt saxlanılıb.
Hazırda gənc barəsində dələduzluq və kiber cinayət maddələri üzrə araşdırma aparılır.
