İspaniya hökumətindən İsrailə qarşı sanksiya addımı
İspaniya Daxili İşlər Nazirliyi, təhlükəsizlik qüvvələrinə sursat tədarük etməli olan İsrailli şirkətlə bağlanmış 6,6 milyon avro dəyərindəki müqaviləni ləğv edib. RTVE dövlət televiziyasının məlumatına görə, qərar “müqavilənin icrasının mümkünsüzlüyü” səbəbilə verilib.
Nazirlik mənbələri təsdiqləyib ki, söhbət IMI Systems LTD şirkətindən alınacaq 9×19 millimetrlik mərmilərin təchizatından gedir. İspaniyada şirkəti “Guardian Homeland Security S.A.” təmsil edirdi.
Bu qərarla Nazirlik İsrailli şirkətlə mövcud olan və qüvvədən düşən son müqaviləni də bağlamış oldu.
Qəzzadakı soyqırıma cavab addımları
İspaniya hökuməti 23 sentyabr tarixli Nazirlər Şurasında qəbul edilən qərarlarla Qəzzadakı soyqırıma qarşı yeni sanksiya mexanizmini işə salmışdı. Bu çərçivədə İsraildən alınan silah və hərbi təchizat müqavilələri ləğv edilməyə başlanıb.
Eyni zamanda, İsrailin işğal etdiyi Fələstin torpaqlarından İspaniyaya daxil olan məhsul və xidmətlərin reklamı da qadağan ediləcək.
İspaniya şirkətləri araşdırılacaq
İspaniyanın Sosial Hüquqlar, İstehlak və 2030 Gündəliyi Nazirliyi bildirib ki, Fələstin torpaqlarındakı qanunsuz məskunlaşmalardan fayda götürən İsrailli şirkətlər və onlarla əməkdaşlıq edən ispan firmaları araşdırılacaq.
Nazirlik bu istiqamətdə BMT-nin xüsusi məruzəçisi Françeska Albanesenin iyul ayında dərc etdiyi “İşğal iqtisadiyyatından soyqırım iqtisadiyyatına” adlı hesabatı əsas götürəcək.
Avropada İsrailə təzyiq artır
Bu addım Avropada İsrailə qarşı təzyiq siyasətinin gücləndiyini göstərir. İspaniya hökuməti Fələstin xalqına dəstək istiqamətində konkret tədbirlər görən azsaylı Qərb ölkələrindən biridir.
