Araşdırmalara görə, İsrail cəmiyyətinin 76 faizi “Qəzzada günahsız yoxdur” fikrini dəstəkləyir. Mütəxəssislər bu yanaşmanı, tarix boyu soyqırımların yolunu açan zehniyyətin bu günkü təzahürü kimi qiymətləndirirlər.
7 oktyabr 2023-dən bəri İsrailin Qəzzada həyata keçirdiyi hücumlar şəhərləri yerlə-yeksan edib, məscidlər, məktəblər, xəstəxanalar bombalanıb. Uşaqlar aclıqdan ölür, xəstəxanalar dərman çatışmazlığı səbəbindən bağlanır. Yardım karvanları belə hədəfə alınır, ərzaq və dərman daşıyan maşınların qarşısı işğalçı məskunçular tərəfindən kəsilir.
Bu dəhşətin fonunda İsrail ictimaiyyətində yayılan bir şüar diqqət çəkir:
“Qəzzada günahsız yoxdur.”
Son sorğuya əsasən, israillilərin 42 faizi bu fikrə tamamilə, 34 faizi isə qismən qatılır. Hətta müxalifət tərəfdarları arasında da bu rəqəm 47 faizə çatır. Beləliklə, artıq təkcə hakimiyyətin ritorikası deyil, bütöv cəmiyyətin mövqeyi də mülki əhalini inkar etməyə yönəlir.
Bir israilli akademikin sözləri bu təfəkkürü açıq şəkildə göstərir:
“Əgər qarşı tərəfdə günahsız yoxdursa, atılan hər bomba haqlıdır.”
Media və siyasət nifrəti qidalandırır
İsraildə siyasətçilərin və medianın istifadə etdiyi dil bu yanaşmanı hər gün təkrarlayır. Televiziya efirlərində “Qəzza tamamilə yox edilməlidir” kimi ifadələr adi şərh kimi səslənir. Qəzetlərdə isə “Qəzzada hər kəs terroru dəstəkləyir, günahsız yoxdur” yazıla bilir.
Beləcə, siyasətçi əmri verir, media onu normallaşdırır, cəmiyyət isə təsdiqləyir. Nəticədə uşaqların ölümü, mülki insanların yox sayılması “adi” hala gətirilir.
Soyqırımın zehni zəmini
Hazırda Qəzzada insanlar aclıq və bombaların arasında həyat uğrunda mübarizə aparır. Minlərlə uşaq qida çatışmazlığından ölür, xəstələr dərman tapa bilmir. Yardım karvanları yolüstü hücuma məruz qalır. Bununla belə, İsrail cəmiyyətinin çoxluğu bu mənzərəni “lazımi bir bədəl” hesab edir.
Ekspertlər xəbərdarlıq edirlər:
“Qonşusunu insan kimi görməkdən imtina edən bir toplum, artıq hər faciəyə hazırdır.”
İsrail cəmiyyətinin böyük hissəsi bu mərhələyə çatıb. Bu isə təkcə Qəzzanın deyil, bütün bölgənin gələcəyini uçuruma sürükləyir.
