Oktyabrda Qərb sahilində zorakılıq rekorda çatdı
Fələstinin Divar və Məskunlaşma Müqaviməti İdarəsinin məlumatına görə, İsrail işğal qüvvələri və yəhudi işğalçılar oktyabr ayında Qərb sahilində ümumilikdə 2350 hücum həyata keçiriblər. Bu rəqəm, bölgədə fələstinlilərə qarşı artan zorakılıq dalğasının davam etdiyini göstərir.
İdarənin rəhbəri Müəyyid Şaabanın açıqlamasına görə, 1584 hücumu İsrail ordusu, 766-sını isə işğalçı yəhudilər törədiblər.
Hücumların mərkəzi Ramallah, Nablus və Xəlil
Hesabatda qeyd olunur ki, hücumların əksəriyyəti Ramallah və Əl-Bira (542 hücum), Nablus (412 hücum) və Xəlil (401 hücum) vilayətlərində baş verib. Bu bölgələrdə xüsusilə kənd təsərrüfatı sahələri və yaşayış evləri hədəfə alınıb.
Hücumlar sırasında fiziki zorakılıq, fələstinli fermerlərin döyülməsi, 15 mindən çox zeytun ağacının kəsilməsi və yandırılması, torpaq və əmlakların müsadirəsi, evlərin və kənd təsərrüfatı tikililərinin sökülməsi kimi hallar yer alır.
Zeytun mövsümündə hücumlar artdı
Fələstinli və BMT rəsmilərinin “Röyters” agentliyinə verdiyi məlumata əsasən, işğalçıların zorakılığı xüsusilə zeytun yığım mövsümündə intensivləşib. İsrail qüvvələrinin “təhlükəsizlik tədbirləri” bəhanəsi ilə kənd təsərrüfatı torpaqlarını bağlaması nəticəsində fermerlərin öz sahələrinə girişi də məhdudlaşdırılıb.
Kənd təsərrüfatında ciddi zərər
Fələstin Kənd Təsərrüfatı Nazirliyinin hesabatına görə, Qərb sahilindəki fermerlərin maliyyə itkisi ötən ilin eyni dövrü ilə müqayisədə 17 faiz artıb. 2024-cü ilin oktyabrına qədər kənd təsərrüfatına vurulan zərərin böyük hissəsi məhz işğalçıların və ordunun hücumları nəticəsində yaranıb.
Divar və Məskunlaşma Müqaviməti İdarəsi vurğulayıb ki, oktyabrdan bəri 15 mindən çox ağac hücuma məruz qalıb, yüzlərlə ailə isə yaşayış yerlərindən məcburi şəkildə çıxarılıb.
Fələstin rəsmiləri beynəlxalq ictimaiyyəti bu artan zorakılıq hallarına qarşı təcili tədbir görməyə çağırıblar.
