Səlfitdə məscidə hücum
İşğal altındakı İordaniya çayının Qərb sahilinin Səlfit şəhərində israilli qəsbkarların dini məkanlara qarşı növbəti hücumu qeydə alınıb. Hadisə şahidlərinin məlumatına görə, silahlı qəsbkarlar gecə saatlarında Deyr İstiya qəsəbəsinə daxil olaraq əl-Həccə Həmidə Məscidini yandırıblar.
Hadisə zamanı qəsbkarlar məscidin divarlarına irqçi məzmunlu yazılar da yazıblar. Bölgə sakinlərinin müdaxiləsi nəticəsində alov nəzarət altına alınıb, lakin ibadətgahın bir neçə hissəsi zərər görüb.
Fələstin Vəqflər Nazirliyi hücumu pislədi
Fələstin Vəqflər Nazirliyi açıqlama yayaraq hadisəni “iyrənc və dini dəyərlərə qarşı açıq hörmətsizlik” kimi qiymətləndirib. Nazirlik bildirib ki, məscidə hücum İsrailin Fələstin ərazilərində İslam və xristian müqəddəsatına qarşı davam edən zorakılığının daha bir təzahürüdür.
Açıqlamada vurğulanıb: “İşğalçıların və qəsbkarların təkrarlanan hücumları səbəbindən artıq təhlükəsiz ibadət məkanı qalmayıb.”
Artan qəsbkar zorakılığı fonunda baş verib
Yerli mənbələrə görə, məscidin atəşə verilməsi İsrail ordusunun himayəsi altında qəsbkar hücumlarının intensivləşdiyi bir dövrdə baş verib. İordaniya çayının Qərb sahilinin müxtəlif bölgələrində basqınlar və hücumlar nəticəsində çox sayda fələstinli yaralanıb.
Son məlumatlar: minlərlə hücum, onlarla ölüm
“Ayrım Divarı və Yəhudi Məskənləri ilə Mübarizə Şurası”nın statistik məlumatlarına əsasən, oktyabr 2023-dən bu yana Qərb sahilində israilli qəsbkarlar tərəfindən 7154 hücum həyata keçirilib. Bu hücumlarda 33 Fələstinli öldürülüb, 33 icma isə yaşadığı ərazilərdən zorla çıxarılıb.
Qəzza əməliyyatlarından sonra gərginlik artır
İsrailin 7 oktyabr 2023-də Qəzza zolağına qarşı hücumları başlatmasından sonra Qərb sahili və Şərqi Qüdsdə fələstinlilərə qarşı basqınlar, zorakı həbslər və hücumlar daha da intensiv xarakter alıb.
