Tulkarm Tam Mühasirəyə Alındı
İşğalçı İsrail ordusu Qərbi Şəriyənin Tulkarm şəhərini tam mühasirəyə alaraq yüzlərlə fələstinlini zorla saxlayıb. Fələstinin rəsmi xəbər agentliyi WAFA-nın məlumatına görə, ordunun gücləndirilmiş nəzarət tədbirləri nəticəsində şəhərin giriş-çıxışları bağlanıb.
İsrail əsgərləri Tulkarımın cənub və şərq qapılarını, o cümlədən Cəbbara körpüsünü və Annab hərbi nəzarət-keçid məntəqəsini bağlayaraq nəqliyyat vasitələrinin hərəkətinə imkan verməyiblər.
Ev və dükanlara basqınlar
Məlumata görə, işğalçı qüvvələr şəhər mərkəzində yerləşən dükan və kafelərə hücum edərək oradakı insanları zorla küçəyə çıxarıb. Onlar yüzlərlə gənci Həduri hərbi nəzarət-keçid məntəqəsinə tərəf piyada aparmağa məcbur ediblər.
Eyni zamanda, çoxsaylı dükanlara basqın edən İsrail əsgərləri təhlükəsizlik kameralarının görüntülərinə də əl qoyublar.
Həbslər və sorğular
Tulkarımda saxlanılan gənclərin bir çoxunun küçədə və ya obyektlərdə yerindəcə sorğu-sual edildiyi bildirilib. Əlavə olaraq, şəhərə çoxlu sayda hərbi texnika və buldozerlərin gətirildiyi qeyd olunub.
Səbəb partlayış hadisəsi
Bütün bu hadisələrdən əvvəl, şəhərin şimalında İsrail ordusuna aid zirehli texnikanın üzərindən keçən partlayıcının işə düşməsi nəticəsində iki əsgər yaralanmışdı. Hadisə zamanı hərbi texnika zərər görmüş, bunun ardınca işğalçı ordu şəhəri mühasirəyə alaraq genişmiqyaslı əməliyyatlara başlamışdı.
