Seçki ərəfəsində siyasi gərginlik
İraqda parlament seçkilərinə az müddət qalmış, ölkənin siyasi səhnəsi yeni bir böhranla qarşılaşıb. Müqtəda Sədrə qarşı sui-qəsd planı ilə bağlı yayılan məlumatlar ölkədə ciddi narahatlıq doğurub. Məlumatlara görə, bu iddialar Sədr hərəkatının silahlı qanadı olan “Səraiyus-Salam”ın Bəsrə vilayətində mövqe tutmasına səbəb olub.
Ərəb mətbuatı yazır ki, İsrail Baş naziri Benyamin Netanyahunun BMT Baş Assambleyasında İraq müqavimət qruplarına qarşı səsləndirdiyi sərt bəyanatlar bu hadisələrə fon təşkil edib. Netanyahu “əl-Həşd əş-Şaabi”ni “yarımhərbi” adlandıraraq, İsrailə qarşı hücum olacağı təqdirdə İraq qruplarının liderlərini hədəfə alacağını açıqlayıb.
İsrailin roluna dair şübhələr
“Rəyi əl-Youm” qəzetində dərc olunan bir məqalədə bildirilib ki, yalnız İsrail İraqın daxili qarşıdurmaya sürüklənməsindən fayda götürə bilər. Məqalədə vurğulanır ki, Tel-Əviv İranla yaxın münasibətləri olan İraq qruplarını zəiflətmək məqsədilə belə gərginliklərdən istifadə edir.
İddialara görə, ABŞ-da yaşayan iraqlı jurnalist Əli Fazil bir televiziya proqramında Müqtəda Sədrə qarşı pilotsuz uçuş aparatları vasitəsilə sui-qəsd planından danışıb və siyasətçi Yasir əl-Malikini bu prosesdə əsas fiqur kimi təqdim edib.
Cavab bəyanatları
Yasir əl-Maliki isə yayılan iddiaları “iftira” adlandıraraq, bunların ölkədə “fitnə” yaratmaq məqsədi daşıdığını deyib. O, İsraili və onun tərəfdarlarını bu planlardan faydalanmaq istəməkdə ittiham edib. Əl-Maliki əlavə edib ki, bu ittihamların arxasında dayananlar qanuni çərçivədə cavab verməli olacaqlar.
Digər tərəfdən, Müqtəda Sədr seçkilərdə iştirak etməyəcəyini bir daha təsdiqləyib. O, atasının – mərhum Ayətullah Məhəmməd Sadiq Sədrin Nəcəfdəki məqbərəsini ziyarət edərkən tərəfdarlarının böyük izdihamı ilə qarşılanıb.
Böhran ehtimalı artır
Analitiklərin fikrincə, Sədrə qarşı sui-qəsd iddiaları tərəfdarlarının küçələrə çıxmasına və qarşıdurmaların başlanmasına səbəb ola bilər. Bu isə seçkilərin gedişinə və ölkənin siyasi sabitliyinə ciddi təsir göstərə bilər.
Parlament seçkilərinin 11 noyabr 2025-ci ildə keçirilməsi planlaşdırılır. Seçkilərdə 329 deputat mandat uğrunda mübarizə aparacaq. Bu proses prezidentin seçilməsi və gələcək baş nazirin təsdiqlənməsi baxımından həlledici rol oynayır.
İndiki vəziyyətdə isə həm daxili siyasi qarşıdurmalar, həm də xarici təzyiqlər fonunda seçkilərin gedişi və nəticələri ilə bağlı suallar daha da çoxalıb. Ekspertlər hesab edir ki, böhran dərinləşərsə, bu, yalnız İsrailin maraqlarına xidmət edəcək.
