az.rasthaber.com xəbər verir ki, İraq təhlükəsizlik orqanları 750 gündən artıq davam edən xüsusi əməliyyat nəticəsində İŞİD terror qruplaşmasına bağlı, ölkə daxilində döyüşçülərin və maliyyə vəsaitlərinin ötürülməsini təmin edən böyük bir şəbəkəni zərərsizləşdirib.
Bağdaddakı mənbələrin bildirdiyinə görə, İraq kəşfiyyatı və terrora qarşı qüvvələr birgə apardıqları transsərhəd əməliyyat çərçivəsində İŞİD-in beynəlxalq maliyyələşdirmə şəbəkəsinin üzvlərini həbs ediblər. Bu qrup müxtəlif ölkələr arasında terrorçuların qaçaqmalçılığı və qruplaşmaya maliyyə resurslarının ötürülməsi ilə məşğul olurdu.
Əməliyyat İraq Ali Məhkəmə Şurasının nəzarəti altında Kərkük vilayətində keçirilib və terror qruplaşmasının maliyyə infrastrukturuna ciddi zərbə vurub.
Məlumata görə, əməliyyat zamanı Qərbi Afrikadan Yaxın Şərqədək bir sıra ölkələrdə terrorçular izlənilib, onların hərəkətləri və əlaqə xətləri izlənərək İraqdakı İŞİD hüceyrələrinin maliyyələşdirilməsi və terror hücumlarının planlaşdırılması planı ifşa olunub.
Xatırladaq ki, bundan əvvəl də İraq mənbələri Suriyaya bitişik sərhəd bölgələrində təkfirçi terrorçuların fəallaşdığını və iki tərəf arasında hərəkətlərin artdığını xəbər vermişdi.
Bununla yanaşı, ötən həftə İraq kəşfiyyat idarəsinin rəhbərinin Suriyada Cəbhət ən-Nusra lideri Əhməd əş-Şərə (Culani) ilə görüşməsi barədə xəbərlər yayıldı. Suriyada təkfirçi ünsürlərin hakimiyyətə gəlməsindən bəri, İraqda İŞİD şəbəkəsinin yenidən canlanması ilə bağlı ciddi narahatlıqlar mövcuddur.
