İranla ABŞ arasında artan gərginlik yeni açıqlamalar fonunda kritik mərhələyə qədəm qoyub. İranın yüksək rütbəli rəsmiləri Vaşinqtonun təhdidlərinə sərt və qətiyyətli bəyanatlarla cavab verərkən, İran Silahlı Qüvvələrinin tam döyüş hazırlığı vəziyyətində olduğu bildirilib.
İranın xarici işlər naziri Abbas İraqçi verdiyi açıqlamada ölkənin müdafiə imkanlarına diqqət çəkərək bildirib ki, “Cəsur silahlı qüvvələrimiz İranın ərazisinə, hava məkanına və dəniz yurisdiksiyasına yönələn istənilən hücuma dərhal və güclü cavab verməyə hazırdır. İranın suverenliyinə uzanan hər bir əl layiqli cavabını alacaq”.
İran İslam İnqilabı Keşikçiləri Korpusunun Hərbi Dəniz Qüvvələrinin komandanı, admiral Əlirza Tanqsiri isə Fars körfəzindəki xarici hərbi varlığı hədəf alaraq bölgənin əsl sahiblərinə vurğu edib. O bildirib ki, körfəzin təhlükəsizliyi yalnız İran və region ölkələri tərəfindən təmin edilə bilər və kənar qüvvələrin burada mövcudluğunun heç bir legitim əsası yoxdur.
ABŞ-a birbaşa mesaj verən Tanqsiri deyib: “Amerikanın regionumuzdan çıxmasının vaxtı çatıb. Əks halda ortaya çıxacaq nəticələrin bütün məsuliyyəti tam şəkildə Vaşinqtonun üzərində olacaq”. Bu açıqlama İranın bölgədəki hərbi və strateji üstünlüyünü xatırladan ciddi xəbərdarlıq kimi qiymətləndirilir.
Digər tərəfdən, ABŞ tərəfindən səsləndirilən bəyanatlar da dolayısı ilə İranın çəkindirici gücünü təsdiqləyib. ABŞ dövlət katibi Marko Rubio regionda yerləşdirilən Amerika hərbçilərinin İranın zərbə radiusu daxilində olduğunu etiraf edərək, Tehranın hərbi potensialının təsirini bir daha ortaya qoyub.
Mütəxəssislər bildirirlər ki, İranın son mesajları təkcə xəbərdarlıq xarakteri daşımır, eyni zamanda regional balansları formalaşdıran strateji güc nümayişidir.
