İranda yeni liderə dəstək aksiyaları keçirildi
İranda Rəhbərlik Ekspertlər Şurasının Müctəba Xameneini İslam İnqilabı və İslam Respublikasının üçüncü ali lideri seçməsi ölkənin müxtəlif şəhərlərində geniş dəstək aksiyaları ilə qarşılanıb. Paytaxt Tehran başda olmaqla bir çox vilayətlərdə minlərlə insan küçələrə çıxaraq yeni liderə sədaqətlərini ifadə edib.
Yürüşlərdə iştirak edən insanlar meydanlarda toplaşaraq Müctəba Xameneinin şəkillərini qaldırıb, şüarlar səsləndirərək qərarı dəstəklədiklərini bildiriblər. Aksiyalar xüsusilə Tehranın mərkəzi meydanlarında böyük izdihamla müşahidə olunub.
Yeni liderin seçilməsi, fevralın 28-də ABŞ və İsrailin həyata keçirdiyi hücum nəticəsində vəzifə başında olarkən şəhid olan Ayətullah Seyid Əli Xameneinin şəhadətindən sonra baş verib.
Rəsmi qurumlar və ictimaiyyət qərarı dəstəklədi
Rəsmi və ictimai tədbirlərdə çıxış edənlər Rəhbərlik Ekspertlər Şurasının qərarının qanuni prosedurlara uyğun qəbul edildiyini vurğulayıblar. Onlar həmçinin ölkənin silahlı qüvvələrinin inqilabın nailiyyətlərini qorumaq və milli təhlükəsizliyi təmin etmək üçün tam hazırlıq vəziyyətində olduğunu bildiriblər.
Bildirilib ki, ölkədə mövcud vəziyyətə baxmayaraq, dövlət institutları fəaliyyətini davam etdirir və siyasi rəhbərlikdə sabitlik qorunur.
Prezident: Yeni mərhələ başlayır
İran prezidenti Məsud Pezeşkian Müctəba Xameneinin ali lider seçilməsini təbrik edərək bu qərarın ölkə üçün yeni bir mərhələnin başlanğıcı olduğunu bildirib.
Prezident qeyd edib ki, bu seçim İran xalqının milli birliyini möhkəmləndirmək iradəsinin göstəricisidir. Onun sözlərinə görə, bu birlik xarici təzyiqlər və planlar qarşısında güclü sipər rolunu oynayacaq.
Pezeşkian əlavə edib ki, mərhum Əli Xameneinin fəaliyyəti ölkənin gələcəyi üçün möhkəm təməl yaradıb və yeni rəhbərlik İran üçün daha parlaq perspektivlər açacaq.
Təhlükəsizlik və siyasi qurumlardan sədaqət bəyanatları
İran Ali Milli Təhlükəsizlik Şurasının katibi Əli Laricani də yeni liderin seçilməsini milli həmrəyliyin təzahürü kimi qiymətləndirib. O bildirib ki, Rəhbərlik Ekspertlər Şurası çətin hərbi və siyasi şəraitdə mühüm qərar qəbul edib.
Laricani seçimin tam qanuni və şəffaf prosedurlarla həyata keçirildiyini vurğulayaraq bütün siyasi qüvvələri yeni lider ətrafında birləşməyə çağırıb.
İnqilab Keşikçiləri: Tam sədaqət andı
İran İslam İnqilabı Keşikçiləri Korpusu da yaydığı bəyanatda Müctəba Xameneinin seçilməsini təbrik edib. Qurum yeni liderin rəhbərliyi altında ölkənin inqilabi məqsədlərə doğru irəliləyəcəyini bildirib.
Bəyanatda qeyd olunub ki, İnqilab Keşikçiləri yeni ali liderin əmrlərini yerinə yetirmək üçün tam hazırdır və bu yolda lazım gəldikdə canlarını qurban verməyə hazır olduqlarını bəyan ediblər.
Silahlı qüvvələrdən və digər qurumlardan dəstək
İran Silahlı Qüvvələrinin Baş Qərargahı və “Xatəmül-Ənbiya” Mərkəzi Komandanlığı da birgə bəyanat yayaraq Müctəba Xameneiyə sədaqətlərini ifadə ediblər. Bəyanatda silahlı qüvvələrin yeni ali liderin rəhbərliyi altında ölkənin təhlükəsizliyini qorumaq üçün tam gücü ilə fəaliyyət göstərəcəyi vurğulanıb.
İranın məhkəmə hakimiyyətinin rəhbəri Qulam Hüseyn Möhsüni Ejei isə bildirib ki, Rəhbərlik Ekspertlər Şurasının qərarı ölkədə siyasi sistemin davamlılığı üçün mühüm əhəmiyyət daşıyır.
Digər tərəfdən, İran xarici işlər naziri Abbas Əraqçi, prezidentin birinci müavini Rza Arif, həmçinin müxtəlif siyasi və dini xadimlər də Müctəba Xameneinin seçilməsini təbrik edərək yeni rəhbərliyə dəstəklərini açıqlayıblar.
