İran Trampın çıxışına sərt reaksiya verdi
İran Xarici İşlər Nazirliyi ABŞ prezidenti Donald Trampın İsraildəki “Knesset” iclasında səsləndirdiyi anti-İran bəyanatlara kəskin etiraz bildirib. Nazirlik bu çıxışda səsləndirilən ittihamları “əsassız və məsuliyyətsiz” adlandırıb və Trampın bu sözlərini “soyqırım cinayətkarlarının iştirakı ilə səsləndirilən böhtan” kimi qiymətləndirib.
Rəsmi bəyanatda qeyd olunub ki, “Birləşmiş Ştatlar – dünyada terrorun ən böyük istehsalçısı və sionist rejimin əsas himayədarı kimi – başqalarını ittiham etməyə mənəvi haqqı olmayan bir dövlətdir.” Nazirlik bildirib ki, İran xalqı “şəhid general Qasım Süleymani və silahdaşlarının Amerika siyasətləri nəticəsində formalaşan təkfirçi terrora qarşı mübarizəsini” heç vaxt unutmayacaq.
“ABŞ və İsrailin birgə cinayətlərini ört-basdır etmək mümkün deyil”
İran XİN bəyan edib ki, Vaşinqtonun İranın sülhməramlı nüvə proqramı ilə bağlı təkrarladığı yalan iddialar ABŞ və İsrailin İran torpaqlarına hücumlarını və iranlı alimlərin qətlini əsaslandıra bilməz. Nazirlik bu addımları “beynəlxalq hüququn açıq şəkildə pozulması və birgə cinayət” adlandırıb.
Açıqlamada əlavə olunub ki, “bu cür cinayətlərə görə məsuliyyət daşımaq əvəzinə onların fəxrlə etiraf edilməsi” ABŞ-ın İran xalqına qarşı düşmənçiliyinin dərinliyini göstərir.
Vaşinqton “sionist rejimin” cinayətlərinə şərik olmaqda ittiham edilir
İran XİN bəyan edib ki, ABŞ-ın “sionist rejimin” Fələstində həyata keçirdiyi soyqırım və hərbi əməliyyatlarda bilavasitə iştirakı artıq danılmaz faktdır. Nazirliyin fikrincə, Vaşinqtonun BMT Təhlükəsizlik Şurasında hərəkətə mane olması və beynəlxalq məhkəmə proseslərini bloklaması “İsrailin cəzasız qalmasına səbəb olur”.
Bəyanatda həmçinin vurğulanıb ki, ABŞ-ın bölgəyə müdaxilə siyasəti, işğal cinayətlərinə dəstək verməsi və silah satışını məhdudiyyətsiz artırması onu “Yaxın Şərqdə sabitliyi pozan əsas amilə” çevirib.
“Sülh istəyən ölkə dinc insanları bombalamaz”
Nazirlik Trampın “sülh və dialoq istədiyini” bəyan etməsini onun “aqressiv və cinayətkar davranışları” ilə ziddiyyətli adlandırıb.
“Əgər məqsəd sülhdürsə, necə olur ki, danışıqlar davam etdiyi vaxt yaşayış məntəqələri və dinc nüvə obyektləri bombalanır, minlərlə insan, o cümlədən qadın və uşaqlar həlak olur?” – bəyanatda qeyd edilib.
İran Xarici İşlər Nazirliyi bəyanatını bu sözlərlə yekunlaşdırıb:
“İran xalqı məntiqli dialoqun tərəfdarıdır, lakin müstəqilliyini, milli ləyaqətini və ali maraqlarını qorumaqda hər zaman cəsarətli və qətiyyətli olacaq.”
