İran XİN: Hücum region xalqlarına qarşı ardıcıl təcavüzdür
İranın Xarici İşlər Nazirliyi İsrailin Suriyanın cənubunda yerləşən Beit Cin qəsəbəsinə qarşı həyata keçirdiyi hava və quru hücumunu sərt şəkildə pisləyib. Nazirliyin rəsmi açıqlamasında qeyd olunur ki, hücum nəticəsində suriyalı mülki şəxslər arasında həyatını itirən və yaralılar var və bu, regionda davam edən gərginliyin daha da dərinləşməsinə səbəb olur.
İran XİN-in sözçüsü İsmayıl Bəqai bildirib ki, bölgə xalqlarının milli suverenliyini və ərazi bütövlüyünü qorumaq hüququ toxunulmazdır. Onun sözlərinə görə, suriyalı gənclərin İsrail qüvvələrinə qarşı göstərdiyi müqavimət “təbii və tamamilə legitim cavab”dır. Bəqai vurğulayıb ki, İsrailin ardıcıl hücumları təkcə Suriyanın deyil, bütün region ölkələrinin təhlükəsizliyini təhdid edir.
Təhlükəsizlik Şurasının fəaliyyətsizliyi tənqid olunur
İran rəsmisi BMT Təhlükəsizlik Şurasının İsrailin bölgədə həyata keçirdiyi mütəmadi təcavüz aktlarına münasibətdə passiv qalmasını “təəssüf doğuran hal” kimi dəyərləndirib. O, Təhlükəsizlik Şurasının fəaliyyətsizliyinin regionda gərginliyi artırdığını və bunun qlobal sülhə ciddi təsir göstərə biləcəyini xəbərdarlıq edib.
Bəqai həmçinin bildirib ki, Suriyanın və Livanın suverenliyinə qarşı təkrar olunan hücumlar beynəlxalq hüququn açıq şəkildə pozulmasıdır və beynəlxalq ictimaiyyət bu hadisələrə biganə qalmamalıdır.
Beit Cində gecə əməliyyatı və qarşıdurma
Səhər saatlarında İsrail hərbi aviasiyası Beit Cin qəsəbəsini intensiv şəkildə bombalayıb. Hücumdan əvvəl sionist rejimin hərbi patrulu qəsəbəyə doğru irəliləyib və bu, yerli sakinlərlə qarşıdurmaya səbəb olub. Hadisə zamanı bölgə üzərində davamlı hərbi helikopter və qırıcıların uçuşu müşahidə olunub. Qarşıdurmada İsrail qüvvələri arasında da yaralananların olduğu bildirilib, bəzi hərbçilərin döyüş meydanını tərk edərək geri çəkildiyi xəbər verilib.
15 Həyatını itirdi, 20 yaralı – son rəqəmlər ağırdır
Suriya İnsan Haqları Müşahidə Mərkəzinin yaydığı son məlumata görə, İsrailin hücumu və ardınca yaşanan toqquşmalar nəticəsində 15 suriyalı həyatını itirib. Həyatını itirənlər arasında qadınlar və 4 uşaq da var. Bundan əlavə, ən azı 20 nəfər yaralanıb və yaralıların bir qisminin vəziyyəti ağır olaraq qiymətləndirilir.
Hadisə bölgədə onsuz da gərgin olan təhlükəsizlik vəziyyətinin daha da mürəkkəbləşdiyini göstərir. İranın sərt reaksiyası isə yaxın günlərdə diplomatik müstəvidə yeni müzakirələrin başlanacağı ehtimalını artırır.
