İran yeni hücum dalğasını elan etdi
İran İnqilab Keşikçiləri Korpusu “Sadiq Vəd 4” əməliyyatının 90-cı dalğasının başladıldığını açıqlayıb. Rəsmi məlumata görə, əməliyyat iki mərhələdə həyata keçirilib və ABŞ ilə sionist rejimə məxsus hədəflər vurulub.
Açıqlamada qeyd olunub ki, hücumlar çərçivəsində regionda fəaliyyət göstərən ABŞ-a bağlı sənaye obyektləri və hərbi mövqelər hədəfə alınıb.
Birinci mərhələdə sənaye obyektləri vurulub
Birinci mərhələdə ABŞ-a aid polad və paslanmayan polad sənayesi obyektlərinin hədəfə alındığı bildirilib. Bu hücumların Birləşmiş Ərəb Əmirliklərinin Əbu-Dabi şəhərində həyata keçirildiyi qeyd olunub.
Bundan əlavə, Bəhreyndə yerləşən ABŞ-a bağlı alüminium sənayesi obyektlərinin əvvəlki hücumdan zərər görməyən hissələrinin də vurulduğu açıqlanıb.
Həmçinin sionist rejimin “Rafael” hərbi sənaye müəssisəsi və ABŞ qüvvələrinin Manama yaxınlığındakı mövqeləri də hədəflər sırasında göstərilib.
İnsan itkisi
İran tərəfi hücumlar nəticəsində onlarla ABŞ hərbçisinin öldüyünü və yaralandığını bildirib. Bildirilib ki, hücumdan sonra ərazi təhlükəsizlik qüvvələri tərəfindən dərhal nəzarətə götürülüb və yaralıların daşınması saatlarla davam edib.
Bu hücumların “xəbərdarlıq xarakteri” daşıdığı vurğulanıb.
İkinci mərhələdə hərbi bazalar hədəf alınıb
Əməliyyatın ikinci mərhələsində işğalçı rejimə məxsus Tel Nof, Palmachim və Ben Qurion hava bazalarının vurulduğu bildirilib. Eyni zamanda Tel-Əviv, Hayfa, Eylat, Negev və Beer-Şeva bölgələrində hərbi toplaşma məntəqələrinin hədəfə alındığı qeyd olunub.
Bundan əlavə, ABŞ-ın “Əhməd əl-Cabir”, “Əli əl-Səlim” və “əl-Xarc” hərbi bazalarına da zərbələr endirildiyi açıqlanıb.
Radar sistemi məhv edilib
İran tərəfi BƏƏ-də yerləşən “əz-Zafra” bazasında erkən xəbərdarlıq radar sisteminin dəqiq zərbə ilə tam məhv edildiyini açıqlayıb.
Açıqlamaya görə, bu mərhələdə ağır ballistik raketlər və kamikadze tipli pilotsuz uçuş aparatlarından istifadə olunub.
Trampa sərt xəbərdarlıq
İran İnqilab Keşikçiləri ABŞ prezidenti Donald Trampa da xəbərdarlıq edərək bildirib ki, təhdidlərin davam etməsi müharibənin daha geniş miqyas almasına səbəb ola bilər.
Qeyd olunub ki, belə bir vəziyyət ABŞ üçün qlobal təhlükəsizlik riskləri yarada bilər.
Hücumların davam edəcəyi bildirilib
İran tərəfi vurğulayıb ki, əməliyyatlar davam edəcək və regionda “cinayət və terror infrastrukturu” kimi qiymətləndirilən hədəflər məhv ediləcək.
Eyni zamanda, ABŞ-ın texnologiya və sənaye şirkətlərinin də gələcəkdə hədəf siyahısına daxil edilə biləcəyi bildirilib.
