Raket və PUA hücumları
İran Ordusu səkkizinci bəyanatında bildirib ki, bu gün sübh saatlarından etibarən dəniz qüvvələri bölgədə İsrail və ABŞ-a məxsus gəmilər və hərbi bazalara qarşı “yer-yer” tipli raketlərlə zərbələr endirib.
Ordunun açıqlamasına görə, quru və hava qüvvələrinə məxsus hücum pilotsuz uçuş aparatları da İsrail ərazisi və Əl-Üdeyd aviabazası istiqamətində raket zərbələri həyata keçirib.
Tehran vurğulayıb ki, silahlı qüvvələr “təcavüzkarlara qarşı hücum və müdafiə əməliyyatlarını qətiyyətlə davam etdirəcək”.
İşğal altındakı torpaqlarda həyəcan siqnalları
Sionist rejim mediasının məlumatına görə, İran ərazisindən İsrail istiqamətində raket buraxılışları qeydə alınıb. Bildirilir ki, Təl-Əviv və ətrafında, həmçinin Netanya bölgəsində hava həyəcan siqnalları səslənib.
Məlumatlarda “Quş Dan” bölgəsində partlayış səslərinin eşidildiyi qeyd olunur. İsrail mediası son yaylımda parçalanan başlıqlı raketlərin istifadə edildiyini iddia edib.
Eyni zamanda, mərkəzi bölgədə yerləşən Petah Tikva şəhərində birbaşa raket zərbəsinin qeydə alındığı, xilasedici qrupların hadisə yerinə cəlb olunduğu bildirilib.
Körfəzdə partlayış səsləri
Bu arada, Agence France-Presse müxbirləri Manama və Doha şəhərlərində yeni partlayış səslərinin eşidildiyini bildiriblər.
Məlumata görə, Manamada bir neçə partlayış baş verib və hava həyəcan siqnalları işə düşüb. Dohada da partlayış səsləri qeydə alınıb.
Qarşıdurma dördüncü gündür davam edir
İran artıq dördüncü gündür Körfəz bölgəsi və İsrail istiqamətində hücumlar həyata keçirdiyini bəyan edir. Tehran bu əməliyyatları ABŞ və İsrailin şənbə günü başlatdığı hücumlara cavab kimi qiymətləndirir.
