İran: Nəsrullahın qətli terror aktıdır və cəzasız qalmayacaq
İran Xarici İşlər Nazirliyi Hizbullahın şəhid baş katibi Seyid Həsən Nəsrullahın şəhadətinin birinci ildönümü münasibətilə bəyanat yayıb. Bəyanatda vurğulanır ki, Nəsrullahın qətli “beynəlxalq hüququn və BMT Nizamnaməsinin açıq şəkildə pozulması, dövlətə qarşı törədilən terror aktı” kimi qiymətləndirilir.
“Cinayətkarların cəzalandırılması əbədi tələbdir”
Nazirliyin açıqlamasında bildirilib:
“Bu qətliam yalnız Livana deyil, bütün regiona qarşı yönəlmiş bir terror aktıdır. Cinayəti törədən sionist rejimin məsuliyyətə cəlb edilməsi bölgə xalqlarının və azad dünyanın əbədi tələbidir.”
Bəyanatda Seyid Həsən Nəsrullahın 30 ildən artıq liderliyi dövründə Livanı gücləndirdiyi və xarici təcavüzə qarşı müdafiə gücünü artırdığı qeyd olunub.
İsrailin siyasəti təhlükə mənbəyi
İran Xarici İşlər Nazirliyi vurğulayıb ki, Nəsrullahın qətlindən bir il sonra bölgədəki reallıqlar daha açıq görünür:
“İsrailin genişlənmə və işğal siyasəti regionun sabitliyi üçün ən böyük təhdiddir. Bu, ‘Böyük İsrail’ planının bir hissəsidir və onun qarşısı yalnız müqavimətlə alına bilər.”
Şəhidlərə ehtiram
Bəyanatda həmçinin Nəsrullahla bərabər şəhid olan digər müqavimət liderlərinin, o cümlədən İranlı general Seyid Abbas Nilfürşanın adları yad edilib. İran XİN şəhidlərin mübarizə yolunun davam etdiriləcəyini bəyan edib və “müqavimət liderlərinin xatirəsinin daim hörmətlə anılacağı” bildirilib.
Beynəlxalq ictimaiyyətə çağırış
İran XİN dünya ictimaiyyətini İsrailin “təhlükəli və qanunsuz siyasətlərinə” qarşı real tədbirlər görməyə səsləyib:
“Beynəlxalq qurumlar İsrailin təcavüzünə göz yummaqla region xalqlarını təhlükə qarşısında buraxır. Bu məsuliyyətsizlik dayandırılmalı və İsrailin cinayətlərinə son qoyulmalıdır.”
İranın dəstək mövqeyi
Bəyanatın sonunda İranın Livana dəstəyinin dəyişməz olduğu vurğulanıb:
“İran həmişə olduğu kimi güclü və müstəqil Livanın yanındadır. Region dövlətləri İsrailin artan təhlükəsini dərk etməli, Livanın sabitliyi və ərazi bütövlüyünü qorumaq üçün birgə mövqe sərgiləməlidirlər.”
