İran: İsrail Qəzzada hərbi cinayətlər törədir
İran Xarici İşlər Nazirliyinin sözçüsü İsmayıl Bəqayi İsrailin Qəzza zolağına qarşı son 24 saatda həyata keçirdiyi hücumları sərt şəkildə qınayıb. O, bu hücumları “davamlı hərbi cinayətlər” adlandıraraq, məsuliyyətin tam şəkildə İsrailin üzərində olduğunu bildirib.
Rəsmi bəyanatda Bəqayi deyib:
“İsrailin Qəzzaya qarşı davam edən hücumlarını qəti şəkildə pisləyirik və bu cinayətlərin məsuliyyətini işğalçı rejim daşıyır.”
Tehran beynəlxalq tərəfləri məsuliyyətə çağırır
İran rəsmisi bəyan edib ki, Tehran atəşkəsin təminatçısı olan dövlətləri Qəzzada baş verənlər qarşısında səssiz qalmamağa çağırır. O, bu dövlətlərin “işğalçı rejimi təcavüzü dayandırmağa məcbur etməli” olduğunu vurğulayıb.
Bəqayinin sözlərinə görə, İsrail “elan edilən hər bir atəşkəs dövründən sui-istifadə edərək yeni hücumlar həyata keçirir və beynəlxalq öhdəliklərini pozur.”
İranın Qəzza ilə bağlı mövqeyi dəyişmir
İran bundan əvvəl də Fələstin xalqına dəstəyini bir daha bəyan edərək, “soyqırım müharibəsinin” dərhal dayandırılmasını, İsrail qüvvələrinin Qəzzadan tam çıxarılmasını və humanitar yardımın fasiləsiz daxil olmasını tələb etmişdi.
Tehran həmçinin fələstinli əsirlərin azad edilməsini və Fələstin xalqının əsas hüquqlarının təmin olunmasını zəruri sayır. İran rəsmiləri dəfələrlə beynəlxalq ictimaiyyəti “sionist rejimin aldatmalarına və beynəlxalq razılaşmaları pozmasına” qarşı ayıq olmağa çağırıblar.
Qəzzada atəşkəs razılaşması
Xatırladaq ki, HƏMAS-ın Qəzzadakı rəhbəri və fələstinli nümayəndə heyətinin başçısı Xəlil əl-Heyyə bu ayın 9 sentyabrında fələstinlilərə qarşı davam edən müharibənin dayandırılması və daimi atəşkəsin başlanması barədə razılığın əldə olunduğunu açıqlamışdı.
Bu razılaşmanın icrası istiqamətində beynəlxalq səviyyədə səylər davam edir. İran isə bu prosesdə bütün tərəfləri “real addımlar atmağa” və “Qəzza xalqına qarşı zorakılığı dayandırmağa” çağırır.
