İran Hörmüz boğazı ilə bağlı mesaj verdi
İran İnqilab Keşikçiləri ABŞ qüvvələrinin Hörmüz boğazında ticarət gəmilərini müşayiət etmək planına sərt reaksiya verib. Qurumun sözçüsü Əli Məhəmməd Naini bildirib ki, İran qüvvələri ABŞ donanmasının hərəkətlərini diqqətlə izləyir.
Onun sözlərinə görə, İran ABŞ hərbi qüvvələrinin bölgədəki addımlarına hazırdır və mümkün qarşıdurmaya qarşı tədbirlər görülür.
“ABŞ qüvvələrini gözləyirik”
Naini açıqlamasında bildirib ki, ABŞ hərbi gəmilərinin boğazda ticarət gəmilərini müşayiət etməsi planları diqqətlə izlənilir.
O ABŞ rəsmilərinə keçmiş hadisələri xatırladaraq xəbərdarlıq edib və 1987-ci ildə hücuma məruz qalan “Bridgeton” neft tankerini nümunə göstərib.
Körfəzdə neft tankeri hədəf alınıb
İran İnqilab Keşikçiləri Körfəz bölgəsində bir neft tankerinin hədəfə alındığını da açıqlayıb. Bu hadisə ABŞ və İsrailin İrana qarşı hücumlarının ikinci həftəsinə daxil olduğu bir vaxtda baş verib.
Məlumata görə, regionda gərginliyin artması səbəbilə Hörmüz boğazında gəmi hərəkəti ciddi şəkildə azalıb və bəzi marşrutlar demək olar ki, iflic vəziyyətinə düşüb.
İraq Kürdüstanında separatçılara zərbələr
İran İnqilab Keşikçiləri eyni zamanda İraqın Kürdüstan bölgəsində fəaliyyət göstərən separatçı qruplara qarşı əməliyyat həyata keçirdiyini bildirib.
Qurumun açıqlamasına görə, səhər saatlarında bölgədə üç müxtəlif mövqeyə zərbələr endirilib.
“Separatçılar məhv ediləcək”
İran tərəfi bildirib ki, ölkənin ərazi bütövlüyünə qarşı hər hansı fəaliyyətə yol verilməyəcək.
Bəyanatda qeyd olunub ki, əgər bölgədə fəaliyyət göstərən separatçı qruplar İranın təhlükəsizliyinə qarşı hərəkət edərsə, onlar tam şəkildə məhv ediləcək.
Sərhəddə gərginlik davam edir
Bundan əvvəl İran silahlı qüvvələri ölkənin qərb sərhədləri yaxınlığında yerləşən separatçı qruplara qarşı qabaqlayıcı zərbələr endirdiyini açıqlamışdı.
Analitiklər bildirirlər ki, ABŞ və İsrail ilə İran arasında davam edən qarşıdurma regionda gərginliyi daha da artırır və Hörmüz boğazında hərbi eskalasiya riskini yüksəldir.
