Arif: Müharibədə məqsədlərinə nail ola bilmədilər
İranın vitse-prezidenti Məhəmməd Rza Arif bazar ertəsi bildirib ki, İrana qarşı aparılan müharibədə qarşı tərəf əvvəlcədən elan etdiyi heç bir məqsədə nail ola bilməyib.
Onun sözlərinə görə, müharibədən sonrakı mərhələdə beynəlxalq ictimaiyyət İranın regionda və beynəlxalq münasibətlərdə daha fəal rol oynayacağını gözləyir.
Arif vurğulayıb ki, İran dialoq və diplomatiya yoluna sadiqdir.
“Biz dialoqa inanırıq və milli maraqlarımızı danışıqlar yolu ilə müdafiə edirik”, – deyə o bildirib.
Tehran ABŞ-nin tələblərini qəbul etmədiyini açıqlayıb
İran xarici işlər nazirinin müavini Kazım Qəribabadi isə bəyan edib ki, İslamabadda keçirilən danışıqlar zamanı Tehran ABŞ-nin irəli sürdüyü həddindən artıq tələbləri qəbul etməyib.
Onun sözlərinə görə, İran danışıqlar prosesində öz mövqeyini və milli ləyaqətini qoruyub saxlayıb.
Hörmüz boğazı ilə bağlı mövqe dəyişməyib
Qəribabadi bildirib ki, Omanda keçirilən danışıqlarda qarşı tərəf Hörmüz boğazının cənub dəhlizinin açıq saxlanılmasında israr edib.
Lakin İran bu təklifi qəbul etməyərək ölkənin əsas prinsiplərinə sadiq qaldığını bəyan edib.
ABŞ ilə gərginlik davam edir
Bundan əvvəl İran Xarici İşlər Nazirliyinin sözçüsü və danışıqlar heyətinin üzvü İsmayıl Bəqayi bildirmişdi ki, ABŞ imzalanmış anlaşmanı və onun bütün müddəalarını pozub.
Onun sözlərinə görə, Tehran da buna cavab olaraq üzərinə götürdüyü öhdəliklərin icrasını dayandırıb.
Bu açıqlamalar ABŞ-nin İrana qarşı hərbi əməliyyatlarının davam etdiyi və İranın Körfəz bölgəsində, Suriya və İordaniyada yerləşən ABŞ hərbi bazalarına zərbələr endirdiyi bir dövrdə səsləndirilib.
