Əraqçi Bakı səfərinin nəticələrini açıqladı
İranın xarici işlər naziri Seyid Abbas Əraqçi Azərbaycana səfərindən sonra Bakı–Tehran münasibətlərinin gələcəyi ilə bağlı mühüm mesajlar verib. Nazir şəxsi “Instagram” hesabında paylaşdığı açıqlamada səfər çərçivəsində keçirilən görüşlər, müzakirə olunan prioritetlər və ikitərəfli münasibətlərin perspektivləri barədə geniş məlumat verib.
Əraqçi bildirib ki, 7–8 dekabr tarixlərində Azərbaycanın paytaxtı Bakıya səfəri zamanı Prezident İlham Əliyev, xarici işlər naziri Ceyhun Bayramov, baş nazirin müavini Şahin Mustafayev, eləcə də Milli Məclisin sədri Sahibə Qafarova ilə əhatəli və konstruktiv görüşlər keçirib. Onun sözlərinə görə, bu təmaslar iki ölkə arasında dialoqun dərinləşdirilməsi baxımından mühüm əhəmiyyət daşıyır.
Tarixi və mədəni bağlara vurğu
İran XİN rəhbəri qeyd edib ki, İran–Azərbaycan münasibətləri təkcə coğrafi qonşuluqla məhdudlaşmır. Bu əlaqələr Arazın hər iki sahilində yaşayan xalqların qədim qohumluğuna, dərin tarixi, mədəni və sivilizasiya bağlarına söykənir. Əraqçi vurğulayıb ki, bu köklü əlaqələr bu gün də ikitərəfli münasibətlərin əsas dayaqlarından biridir.
Nazirin sözlərinə görə, hazırda iki ölkə arasında əməkdaşlıq iqtisadiyyat və tranzit, siyasi münasibətlər, mədəniyyət və humanitar sahələr daxil olmaqla bütün istiqamətlərdə inkişaf edir. O bildirib ki, Tehran və Bakı mövcud ortaq əsaslar üzərində əməkdaşlığı strateji səviyyəyə yüksəltməkdə qətiyyətlidir.
Regional sabitlik əsas şərt kimi qiymətləndirilib
Əraqçi paylaşımında görüşlər zamanı regional təhlükəsizlik məsələlərinin xüsusi diqqət mərkəzində olduğunu da qeyd edib. Onun sözlərinə görə, bütün təmaslarda Cənubi Qafqazda sabitlik və təhlükəsizliyin bölgə ölkələrinin inkişafı və rifahı üçün əsas şərt olduğu vurğulanıb.
Bununla yanaşı, üçüncü tərəflərin Azərbaycan və İran arasında mövcud olan konstruktiv münasibətlərə mənfi təsir göstərməsinə yol verilməməsinin vacibliyi də xüsusi olaraq qeyd edilib. İranlı nazir bildirib ki, tərəflər ikitərəfli əlaqələrin yalnız qarşılıqlı maraqlar və hörmət prinsipi əsasında inkişaf etməli olduğu mövqeyində həmfikirdir.
“Ortaq, təhlükəsiz və şərəfli gələcək”
Seyyid Abbas Əraqçi paylaşımının yekununda Tehran və Bakının siyasi iradəsini açıq şəkildə ifadə edib. O vurğulayıb ki, İran və Azərbaycan qarşılıqlı hörmətə əsaslanan, ortaq, təhlükəsiz və şərəfli gələcək inşa etməkdə qətiyyətlidir.
Bu açıqlamalar regional proseslər fonunda Bakı–Tehran xəttində münasibətlərin yeni mərhələyə keçidinə dair mühüm siyasi mesaj kimi qiymətləndirilir.
