Aİ-nin qərarına İran ordusundan kəskin etiraz
İran ordusu Avropa İttifaqının İslam İnqilabı Keşikçiləri Korpusunu (SEPAH) “terror təşkilatı” kimi tanıması ilə bağlı qərarını sərt şəkildə pisləyib. Ordunun yaydığı rəsmi bəyanatda bildirilib ki, İran Silahlı Qüvvələri terrorizmə qarşı mübarizədə SEPAH-la qətiyyətlə həmrəydir və bu cür siyasi qərarlar regionda təhlükəsizliyə xidmət etmir.
Bəyanatda vurğulanıb ki, özlərini terrorla mübarizə aparan tərəf kimi təqdim edənlər əslində “terrorçu sionist rejimin əsas dəstəkçiləridir”. Eyni zamanda qeyd olunub ki, Avropa ölkələrinin əlləri 17 min iranlının qanına batıb və onlar terror qruplaşmalarına sığınacaq veriblər.
“ABŞ və İsrailə xidmət edən saxta siyahı”
İran ordusunun açıqlamasında Avropa İttifaqının qərarı “saxta siyahı” kimi dəyərləndirilib. Bildirilib ki, Avropa dövlətləri regionda və dünyada terrorla mübarizədə aparıcı rol oynayan bir qurumu ABŞ və İsrailin maraqları naminə “terrorçu” elan edib.
Rəsmi mövqeyə görə, bu addım beynəlxalq hüquqa zidd olmaqla yanaşı, terrorizmlə real mübarizəyə də ciddi zərbə vurur.
Məhkəmə hakimiyyətindən xəbərdarlıq
“Bu addım düşmənçilik aktıdır”
İranın məhkəmə hakimiyyətinin rəhbəri Qulam Hüseyn Möhsini Ejei də Aİ-nin qərarını sərt sözlərlə tənqid edib. O bildirib ki, SEPAH dünyaya sübut edib ki, qlobal və regional terrorizmlə mübarizənin ön cəbhəsində yer alır.
Ejeinin sözlərinə görə, SEPAH-ın terror təşkilatı kimi tanınması Avropa İttifaqının ABŞ və İsrail qarşısında açıq şəkildə təslim olmasıdır. O vurğulayıb ki, bu qərar siyasi maraqlara əsaslanır və beynəlxalq hüququn fundamental prinsiplərinə ziddir.
“SEPAH olmasaydı, İŞİD Avropanı qorxudacaqdı”
Məhkəmə hakimiyyətinin rəhbəri xatırladıb ki, məhz SEPAH-ın fəaliyyəti nəticəsində İŞİD terror qruplaşması darmadağın edilib. Onun sözlərinə görə, Avropa ölkələri bunu unutmamalıdır, çünki həmin qruplaşma bir vaxtlar Avropa paytaxtlarını təhdid edirdi.
Ejei əlavə edib ki, Vaşinqton və Təl-Əvivə tam bağlı vəziyyətdə olan Avropa dövlətlərinin terrorla əlaqələri olan qruplarla açıq və gizli münasibətlər saxlaması fonunda SEPAH-ı “terrorçu” adlandırması təəccüblü deyil.
“Cavabsız qalmayacaq” xəbərdarlığı
İran rəsmisi çıxışının sonunda Aİ-ni açıq şəkildə xəbərdar edib. O bildirib ki, bu düşmənçilik addımı cavabsız qalmayacaq və Avropa ölkələri atdıqları bu qərarın nəticələrini hiss edəcəklər. Ejeinin sözlərinə görə, ABŞ-ı təqlid etmək Avropa üçün baha başa gələcək.
Qeyd edək ki, bir gün əvvəl Avropa İttifaqı SEPAH-ı “terror təşkilatları” siyahısına daxil edib. Bu barədə Aİ-nin xarici siyasət üzrə ali nümayəndəsi Kaya Kallas rəsmi açıqlama verib.
