İran Aİ-ni “yanlış tərəfdə dayanmaqda” ittiham edir
İran Xarici İşlər Nazirliyinin sözçüsü İsmayıl Bəqai Avropa İttifaqının İran ətrafında baş verən müharibə ilə bağlı mövqeyini sərt şəkildə tənqid edib. O bildirib ki, Aİ rəhbərliyi yalan məlumatların yayılmasına və hadisələrin təhrif edilməsinə son qoymalıdır.
Bəqai sosial şəbəkə platforması X-də paylaşdığı açıqlamada qeyd edib ki, “xaos və cinayətlər qarşısında susmaq onları törətməkdən fərqlənmir”. Onun sözlərinə görə, Aİ-nin mövcud mövqeyi regiondakı hadisələrin obyektiv qiymətləndirilməsinə mane olur.
Ursula fon der Leyenə yönələn tənqidlər
İran rəsmisi paylaşımında Avropa Komissiyasının sədri Ursula fon der Leyenə də birbaşa müraciət edib. O bildirib ki, Avropa İttifaqı İsrailə “soyqırım törətmək üçün yaşıl işıq yandırmaqla” tarixin yanlış tərəfində yer alıb.
Bəqainin sözlərinə görə, hazırda Aİ İsrail və ABŞ tərəfindən iranlılara qarşı törədilən cinayətləri ört-basdır etməyə çalışır. O vurğulayıb ki, bu yanaşma regionda gərginliyi daha da artırır və beynəlxalq hüququn prinsiplərinə ziddir.
İran məktəblilərin öldürülməsi ilə bağlı sual qaldırdı
İran XİN sözçüsü çıxışında bir sıra suallar da səsləndirib. O soruşub ki, 165 iranlı məktəblinin öldürüldüyü vaxt Avropa İttifaqı harada idi.
Bəqai həmçinin xəstəxanaların, tarixi abidələrin, neft obyektlərinin, diplomatik polis idarələrinin, yanğınsöndürmə məntəqələrinin və yaşayış məhəllələrinin hədəfə alınması zamanı Aİ-nin reaksiyasının niyə görünmədiyini sual edib.
Onun fikrincə, bu cür hücumlar beynəlxalq hüququn kobud şəkildə pozulmasıdır və buna qarşı səssiz qalmaq məsuliyyətdən yayınmaq deməkdir.
Avropa İttifaqının təcili iclası
Qeyd edək ki, Avropa İttifaqı ötən gün regionda sürətlə dəyişən vəziyyəti müzakirə etmək üçün videokonfrans formatında təcili iclas keçirib. İclasda “Yaxın Şərq”də baş verən hadisələr və təhlükəsizlik vəziyyəti müzakirə olunub.
Aİ rəhbərinin açıqlaması
Avropa Komissiyasının sədri Ursula fon der Leyen isə açıqlamasında İranı regionda gərginliyi artırmaqda ittiham edib. O bildirib ki, İranın raket və pilotsuz uçuş aparatları regionda təhlükəsizlik vəziyyətini pisləşdirib.
Fon der Leyen əlavə edib ki, Avropa İttifaqının Körfəz regionundakı tərəfdaşları İran tərəfindən həyata keçirilən hücumlara məruz qalır. Lakin o, ABŞ və İsrailin İrana qarşı hərbi əməliyyatlarına birbaşa toxunmayıb.
