4 ballistik raketlə zərbə iddiası
İran İslam İnqilabı Keşikçiləri Korpusu (SEPAH) ABŞ-a məxsus USS Abraham Lincoln aviadaşıyıcısına qarşı 4 ballistik raketlə “mərkəzləşdirilmiş hücum” həyata keçirildiyini açıqlayıb.
SEPAH-ın “Doğru Vəd 4” əməliyyatı üzrə yaydığı 7-ci bəyanatda bildirilib ki, İran silahlı qüvvələrinin zərbələri yeni mərhələyə daxil olub. Açıqlamada “quru və dənizin təcavüzkarlar üçün məzara çevriləcəyi” ifadə edilib.
ABŞ-İsrail hücumuna cavab
Tehran bu əməliyyatı ABŞ və İsrailin İrana qarşı başlatdığı genişmiqyaslı hücumlara cavab kimi təqdim edir. İran tərəfi son günlərdə ABŞ bazaları və İsrail hədəflərinə qarşı ardıcıl zərbələr endirdiyini bəyan edib.
“MQ-9” pilotsuz aparatı vuruldu
SEPAH həmçinin ABŞ ordusuna məxsus MQ-9 Reaper tipli pilotsuz uçuş aparatının İran hava hücumundan müdafiə sistemləri tərəfindən məhv edildiyini göstərən görüntülər yayımlayıb.
Açıqlamada bildirilib ki, bu addım İranın hava məkanına qarşı həyata keçirilən hücumlara cavab çərçivəsində atılıb.
Gərginlik dənizə yayılır
Ekspertlərin fikrincə, aviadaşıyıcının hədəfə alınması iddiası qarşıdurmanın dəniz müstəvisinə keçdiyini göstərir və regional müharibə riskini artırır.
Hazırda ABŞ tərəfindən hücumla bağlı rəsmi təsdiq və ya təkzib açıqlaması verilməyib. Regionda vəziyyət son dərəcə gərgin olaraq qalır.
