Yeniyetmə sürücüyə hökm oxundu
İmişlidə bu ilin 18 yanvar tarixində baş vermiş və üç məktəblinin həyatını itirməsi ilə nəticələnmiş ağır yol-nəqliyyat hadisəsi üzrə məhkəmə prosesi yekunlaşıb. Lənkəran Ağır Cinayətlər Məhkəməsi 17 yaşlı Bəylər Bayramlını yol hərəkəti qaydalarını pozmaqda, sürücülük vəsiqəsi olmadan avtomobil idarə etməkdə və qəzadan sonra hadisə yerini tərk etməkdə təqsirli bilərək ona 7 il 6 ay müddətinə azadlıqdan məhrumetmə cəzası verib.
İttihama görə, yeniyetmə həmin gün dayısına məxsus “Mercedes-Benz 190” avtomobilini şəhər daxilində idarə edərkən sol dönüş zamanı yol polisinin idarə etdiyi BMW-yə yol verməyib və nəticədə avtomobillər toqquşub.
Təqsirləndirilən şəxs: “Toqquşmadan yayınmaq imkanı daha çox yol polisində idi”
Bəylər Bayramlı ifadəsində bildirib ki, sola dönmək istəyəndə yol polisi maşınının hələ uzaqda olduğunu düşünüb:
“BMW çox uzaqda idi, rahat dönə biləcəyimi hesabladım. Yol polisi isə yüksək sürətlə gəlirdi. Bizi əvvəlcədən görə bilərdi.”
O həmçinin iddia edib ki, polis əməkdaşı toqquşmadan əvvəl əyləc tətbiq etməyib və hadisə baş verən an səs siqnalı çalınıb. Qəzadan sonra hadisə yerindən qaçması ittihamını isə qəbul etməyib:
“Maşından düşüb BMW-yə tərəf qaçdım, uşaqları yerdə gördüm, qorxdum. Dayımı yığdım, o da dedi ki, polisə gedib təslim olum.”
Polis əməkdaşı: “Huşumu itirdim, yalnız hospitalda ayıldım”
Hadisə zamanı BMW-ni idarə edən yol polisi əməkdaşı Ülvi Əhmədov məhkəmədə şahid qismində ifadə verib. O, saatda 60–70 km sürətlə hərəkət etdiyini, həm sayrışan işıqları, həm də səs siqnalını yandırdığını bildirib:
“Mercedes sol tərəfdən çıxıb və mənim avtomobilimə çırpılıb. Toqquşmadan sonra huşumu itirdim.”
Lakin ekspertiza polis avtomobilinin orta sürətinin həmin an 159 km/saat olduğunu müəyyən edib.
Qəza üç məktəblinin həyatına son qoydu
Hadisə nəticəsində 6-cı sinif şagirdi Zümrüd Mirəliyeva və 4-cü sinif şagirdi Ayan Məmmədova yerindəcə həyatını itirib. Ayanın sinif yoldaşı Məhbubə Əlizadə isə Bakıya aparılsa da, həkimlər onun həyatını xilas edə bilməyiblər.
Uşaqların ailələri Bəylər Bayramlıdan şikayətçi olmayıb.
İmişlidə etirazlar və sonrakı məhkəmələr
Qəza baş verdikdən sonra İmişlidə geniş etiraz aksiyaları keçirilmiş, sakinlər DYP-yə məxsus avtomobili aşırmış və “istefa” şüarları səsləndirmişdilər. Yerli sakinlərin sözlərinə görə, ən azı 100 nəfər saxlanılıb və onlara qarşı zorakılıq tətbiq edilib.
Bu ilin iyulunda həmin hadisələrlə bağlı 19 nəfər barəsində məhkəmə hökmü çıxarılıb. Onlardan səkkizi 1 ildən 4 ilə qədər azadlıqdan məhrum edilib, digər 11 nəfərə isə 1 ildən 4 ilə qədər azadlığın məhdudlaşdırılması cəzası verilib.
