“Bu müharibə sadə və keçici deyildi”
İranın mərhum lideri İmam Xomeyninin nəvəsi, höccətül-islam vəl-müslimin Seyid Əli Xomeyni Kaşanda, Məşhəd Ərdəhalda yerləşən Həzrət Əli ibn İmam Məhəmməd Baqirin (ə) müqəddəs məqbərəsində çıxışı zamanı 12 günlük müharibə ilə bağlı mühüm açıqlamalar verib. O, “müasirlik hicabı” anlayışına toxunaraq bildirib ki, yaşadığımız dövrdə bir çox hadisələr mahiyyətinə uyğun şəkildə dərk edilmir.
Seyid Əli Xomeyninin sözlərinə görə, İran xalqının arxada qoyduğu 12 günlük müharibə sadə və qısa müddətli qarşıdurma olmayıb. Onun fikrincə, sionist rejim bu müharibəyə dərin və çoxqatlı planlaşdırma ilə daxil olub.
Düşmənin planları illərlə hazırlanıb
Çıxışında mövcud analizlərə diqqət çəkən Seyid Əli Xomeyni qeyd edib ki, yayılan hesabatlara əsasən hücum planları səkkiz aylıq, səkkiz illik, hətta otuz illik perspektivlə hazırlanıb. O vurğulayıb ki, bu üç yanaşmanın hər biri doğru ola bilər və düşmənin İrana zərbə vurmaq üçün müxtəlif səviyyələrdə planlar qurduğunu göstərir.
Ali Rəhbərin rolu “əsas və həlledici” olub
İmam Xomeyninin nəvəsi Ali Baş Komandan, Ayətullah Seyid Əli Xameneinin bu müharibənin idarə olunmasındakı rolunu “əsas və həlledici” adlandırıb. O bildirib ki, bir fəqihin həm xalqa arxayınlıq verməsi, həm də komandirləri ən təhlükəli müharibələrdən birində düzgün istiqamətləndirməsi həqiqətən şükür ediləsi haldır.
Seyid Əli Xomeyninin sözlərinə görə, bu müharibə praktiki olaraq imperialist sistemin planlarını zərərsizləşdirib.
“Düşmənin uğur qazandığı iddiası yalandır”
Bəzi dairələrin düşmənin məqsədlərinə çatdığı barədə iddialarını qəti şəkildə rədd edən Seyid Əli Xomeyni bildirib ki, bir neçə komandirin şəhid edilməsi və müəyyən nöqtələrin vurulması ilə müharibənin başa çatdığı iddiası tamamilə əsassızdır. Onun fikrincə, geosiyasət və qlobal strategiya barədə minimal anlayışı olan hər kəs bilir ki, İranla müharibə 10–12 günə bitəcək şəkildə planlaşdırılmamışdı.
Raket gücü və “Doğru Vəd” əməliyyatları
Seyid Əli Xomeyni İranın raket imkanlarına da toxunaraq sual edib: düşmən İranın raket gücündən xəbərsiz idimi? O xatırladıb ki, “Doğru Vəd 1” və “Doğru Vəd 2” əməliyyatlarında bu potensial açıq şəkildə nümayiş olunmuşdu. Onun sözlərinə görə, düşmən İranın bitdiyini iddia etmək üçün özünün əsas identiklik amili olan “təhlükəsizlik” anlayışını riskə atmağa hazır olub.
“Məsələ bir neçə komandirin hədəf alınması deyildi”
İmam Xomeyninin nəvəsi vurğulayıb ki, heç kim sadəcə bir neçə komandiri aradan götürmək üçün onilliklər boyu plan qurmaz. Bu layihə daha böyük hədəflər üçün hazırlanmışdı, lakin xalqın müqaviməti, silahlı qüvvələrin fədakarlığı və Ali Baş Komandanın müdrik idarəçiliyi bu planı iflasa uğradıb.
Silahlı qüvvələrə təşəkkür və daxili problemlər
Seyid Əli Xomeyni çıxışında Silahlı Qüvvələrə, xüsusilə də SEPAH və ordunun döyüşçülərinə təşəkkür edərək bildirib ki, bu 12 gündə görülən iş imperializmin “burnunu yerə sürtmək” idi və bu mövzuda onlarla sənədli film çəkilməlidir.
O, həmçinin daxili məsələlərə toxunaraq qeyd edib ki, xalqın etirazı dinə və inqilaba deyil, korrupsiya, səmərəsizlik və sui-istifadəyə yönəlib. Onun sözlərinə görə, düşmən cəmiyyətə xalqın din və inqilabla problemi olduğu fikrini təlqin etməyə çalışır, lakin bu, həqiqəti əks etdirmir.
“Zülmə qarşı yalnız güc təsirlidir”
Çıxışının sonunda Seyid Əli Xomeyni vurğulayıb ki, imperializm yalnız güc dilini anlayır və zülm etmək niyyəti olan tərəflə danışıqlar onu dayandırmır. O əlavə edib ki, İranın parçalanması düşmənlərin əsas məqsədlərindən biridir və Qəzza bu siyasətin açıq nümunəsidir.
