Yəməndəki Ənsarullah Hərəkatının lideri Seyyid Əbdülməlik Bədrəddin əl-Husi ABŞ-ın İranda “ağır və utancverici bir məğlubiyyətə uğradığını” bildirib.
Əl-Husi Yəmən Ali Siyasi Şurasının keçmiş sədri Saleh əs-Sammadın şəhadətinin ildönümü münasibətilə etdiyi həftəlik çıxışında regional və beynəlxalq hadisələri dəyərləndirib, Yəmənə qarşı hücumların miqyasına diqqət çəkib.
Yəmən xalqının çəkdiyi əzabların qlobal sionizmin planlaşdırdığı və ABŞ, Böyük Britaniya ilə İsrailin birbaşa nəzarəti altında həyata keçirilən hücumların nəticəsi olduğunu vurğulayan əl-Husi, bu hücumların Səudiyyə Ərəbistanının rəhbərlik etdiyi koalisiya tərəfindən icra edildiyini və bu böyük cinayətin əsas yükünü də həmin koalisiyanın daşıdığını bildirib.
Ənsarullah lideri Yəmənə qarşı hücumların ABŞ, Böyük Britaniya və İsrail tərəfindən birbaşa planlaşdırıldığını qeyd edərək, bu həqiqətin ABŞ-ın hücumun başlanmasını rəsmi şəkildə elan etməsi ilə açıq-aydın ortaya çıxdığını deyib. Əl-Husi ABŞ-ın müharibənin ilk günündən etibarən rolunun davamlı, açıq və inkaredilməz olduğunu vurğulayıb.
Hücumların iqtisadi və geosiyasi hədəflərinə də toxunan əl-Husi, Hədrəmut, əl-Məhra və Yəmənin digər bölgələrindəki zəngin neft ehtiyatlarının ABŞ, İsrail, Böyük Britaniya və Səudiyyə Ərəbistanının iştahasını artırdığını bildirib. O, bu ölkələrin Yəmənin təbii sərvətlərini və strateji mövqeyini nəzarət altına almağı hədəflədiyini qeyd edib.
Əl-Husi xəbərdarlıq edib ki, sözügedən qüvvələr Yəməni tam şəkildə işğal edərsə, ölkənin həssas coğrafi mövqeyindən hərbi bazalar qurmaq və müstəmləkəçi layihələrini həyata keçirmək üçün istifadə edəcəklər.
Yəmənə qarşı hücumları “bənzəri görünməmiş” adlandıran əl-Husi, yüz minlərlə hava zərbəsi, infrastrukturun genişmiqyaslı dağıdılması, ağır blokada və əhalinin birbaşa hədəfə alınmasının bu hücumların əsas xüsusiyyətləri olduğunu bildirib. O, bu hücumların dağıdıcı və humanitar nəticələrinin hələ də davam etdiyini vurğulayıb.
Ənsarullah lideri ABŞ-ın İrana qarşı yönəlmiş təşəbbüslərinin genişmiqyaslı, sərt və çoxşaxəli olduğunu, lakin bütün bu səylərin tam uğursuzluqla nəticələndiyini qeyd edib. Əl-Husi bu layihə ilə əlaqəli “cinayət şəbəkələrinin” dağıldığını və İrandakı vəziyyətin tam nəzarət altında olduğunu bildirərək, ABŞ-ın bu dosyedə ağır və utancverici bir məğlubiyyət yaşadığını deyib.
Çıxışının bir hissəsində Qəzza və bu bölgəyə dair siyasi planlara da toxunan əl-Husi, “Qəzza Sülh Şurası” adlandırılan təşəbbüsün əslində “Tramp Şurası” olduğunu iddia edib. O, bu qurumun zorakılıq, hegemonluq, diktatura və Fələstin xalqının sərvətlərini ələ keçirmək məqsədi ilə yaradıldığını bildirib.
Əl-Husi qeyd edib ki, sözügedən planın ikinci mərhələsində əsas prioritet Fələstin xalqının silahsızlandırılmasıdır və hətta fərdi silahlar belə bu hədəf çərçivəsinə daxildir. O, bu şuranın ilk növbədə ABŞ və İsrailin maraqlarına xidmət etdiyini, digər tərəfləri isə sadəcə bir vasitə kimi gördüyünü vurğulayıb.
Ənsarullah lideri çıxışının sonunda xalqın yaxın gələcəkdə “Tramp Şurası”nın əsl simasını açıq şəkildə görəcəyini, bu həqiqətlərin isə artıq indidən bir çox insanlar üçün aydınlaşdığını bildirib.
