Tartus limanı 30 illik müqavilə ilə BƏƏ-yə verildi
Suriya rəsmi olaraq ölkənin ikinci böyük dəniz qapısı olan Tartus limanının idarəçiliyini Birləşmiş Ərəb Əmirliklərinin logistika nəhəngi DP World şirkətinə verib. Bu, 30 illik və 800 milyon dollarlıq konsesiya müqaviləsi əsasında həyata keçirilib.
Müqavilə Suriya Torpaq və Dəniz Limanları üzrə Baş İdarəsi ilə imzalanıb və DP World qısa müddət əvvəl limanın idarə edilməsinə tam rəsmən başlayıb.
DP World Tartus-un baş direktoru təyin edilən Fahad əl-Bənna bildirib:
“DP World-ün qlobal təcrübəsini tətbiq edərək Tartusu müasir, rəqəmsal həllərlə gücləndirilmiş limana çevirməyə, ticarəti artırmağa və Şərqi Aralıq dənizinin əsas ticarət mərkəzinə çevirməyə sadiqik.”
Şirkət limanın infrastrukturunu yeniləməli, yükləmə-boşaltma və saxlama gücünü artırmalı, həmçinin iri həcmli yüklər üçün yeni sistemlərə yatırım etməlidir.
HTŞ Rusiyanın müqaviləsini ləğv etdi
Hazırkı HTŞ rəhbərliyi iyun ayında 2019-cu ildə sabiq prezident Bəşər Əsəd hökumətinin Rusiya şirkəti Stroytransgaz ilə imzaladığı Tartus limanının idarəçiliyi müqaviləsini ləğv etdiyini açıqlamışdı. Səbəb kimi şirkətin limanın modernləşdirilməsinə vəd etdiyi 500 milyon dollarlıq investisiyanı həyata keçirməməsi göstərilmişdi.
Bununla Suriyada limanların bölgüsü kəskin şəkildə dəyişib və Rusiya müqavilələri tamamilə hökmsüz sayılıb.
Latakiya limanı Fransaya verildi
Tartusdan əlavə, ölkənin ən böyük limanı olan Latakiyanı idarə etmək üçün Fransanın nəhəng dəniz daşımaları şirkəti CMA CGM ilə ayrı bir 30 illik konsesiya imzalanıb. Bu addım Suriyanın liman iqtisadiyyatını tamamilə yenidən formalaşdırır.
Trampın sanksiyaları ləğv etməsi prosesə təkan verdi
ABŞ prezidenti Donald Tramp may ayında Suriyaya qarşı bütün Amerika sanksiyalarının ləğv edildiyini bəyan etmişdi. Bu qərarı o, Səudiyyə Ərəbistanında – Riyadda, HTŞ rəhbəri Əbu Məhəmməd əl-Colani ilə görüşü zamanı elan etmişdi.
Görüşdə Colani Dəməşqlə İsrail arasında münasibətlərin normallaşdırılması niyyətini də ifadə etmişdi.
HTŞ-nin hakimiyyətə gəlişi
Bir zamanlar Əl-Qaidə və İŞİD-lə əlaqəli olan HTŞ qruplaşması 2024-cü ilin dekabrında Bəşər Əsəd hökumətini devirdikdən sonra Suriyada hakimiyyəti ələ keçirib. Colani sürətli hücumlarla ölkənin əsas siyasi və inzibati strukturlarını nəzarətə götürüb və hazırda faktiki olaraq Suriya dövlətinə rəhbərlik edir.
Limanların yenidən bölüşdürülməsi isə HTŞ-nin iqtisadi infrastruktur üzərində tam nəzarət qurmaq üçün atdığı ən böyük addımlardan biri kimi qiymətləndirilir.
