İsrailə qarşı mədəniyyət boykotu: Avropadan güclü etiraz
Hollandiya və Belçikada fəaliyyət göstərən 302 muzey, sənət və mədəniyyət qurumu, həmçinin 878 sənətçi birgə bəyanatla İsrailə qarşı mədəniyyət boykotuna qoşulduqlarını açıqlayıblar. Bəyanatda Qəzzədəki qırğınlar və Qərb sahilində işğal siyasətinin davam etdirilməsi səbəbindən İsrail dövlət qurumları və şirkətləri ilə əməkdaşlığın dayandırıldığı bildirilib.
“Soyqırımı seyr etməyəcəyik”
Bəyanatda qeyd olunur ki, Qəzzədə fələstinlilərə qarşı törədilən müharibə cinayətləri, insanlığa qarşı cinayətlər və beynəlxalq qurumların tanıdığı soyqırımı qarşısında Hollandiya və Belçikanın mədəniyyət sektoru susqun qala bilməz. İmzalanan sənəddə İsrail dövlətinə bağlı qurum və şirkətlərin boykot ediləcəyi, lakin yəhudi icmasına və ya fərdi israillilərə qarşı deyil, işğal siyasətində iştirak edən qurumlara qarşı bu qərarın alındığı vurğulanıb.
Əsas qurumlar və sənətçilər dəstək verdi
Boykota qoşulanlar arasında Maastricht Bonnefanten Muzeyi, Gent İncəsənət Muzeyi, Hollanda Film Festivalı, Holland Opera, Flaman Kral Teatrı kimi mühüm qurumlar var. Tanınmış sənətçilərdən Marlene Dumas, Tom Lanoye, David Van Reybrouck, Ramsey Nasr və Sinan Çankaya da bəyanatı imzalayıb.
Tarixi paralel: Cənubi Afrikadakı apartheyd
Bildiridə qeyd olunub ki, bu qərar asan alınmayıb, lakin mədəniyyət sektorunun dünyanı daha ədalətli etmək missiyası var. İsrailə qarşı tətbiq edilən bu boykotun, vaxtilə Cənubi Afrikada apartheyd rejiminin çöküşünə töhfə vermiş mədəniyyət boykotu təcrübəsinə söykəndiyi vurğulanıb.
Digər sahələrə də çağırış
Bəyanatda həmçinin idman, akademiya, iqtisadi və siyasi qurumlara da İsrail ilə əməkdaşlığı dayandırmaq çağırışı edilib:
“Soyqırımı və işğalı dayandırmaq üçün yalnız mədəniyyət boykotu kifayət deyil. Ancaq birlikdə hərəkət edərək İsraili beynəlxalq hüquqa əməl etməyə məcbur edə bilərik.”
