Hollandiya Eurovision qərarını açıqladı
Hollandiya dövlət yayımlayıcısı AVROTROS bəyan edib ki, ölkə 2026-cı ildə keçiriləcək Eurovision Mahnı Müsabiqəsinə qatılmayacaq. Səbəb kimi isə İsrailin iştirakına yaşıl işıq yandırılması göstərilib.
Qurumun açıqlamasında, “Qəzzada davam edən ağır humanitar faciə fonunda hazırkı şəraitdə İsrailin Eurovision-a qatılmasını müdafiə edə bilmərik” sözləri yer alıb.
Digər ölkələr də boykot qərarına qoşulub
Hollandiya ilə yanaşı, Sloveniya, İspaniya, İslandiya və İrlandiyanın da oxşar mövqe sərgilədiyi və İsrailin yarışmaya qatılması halında onlar da iştirakdan imtina edəcəkləri bildirilib.
“Eurovision apolitik olmalıdır”
AVROTROS-un açıqlamasında vurğulanıb ki, bu il keçirilən yarışmada İsrail hökumətinin birbaşa müdaxiləsinin sübut olunması, yarışmanın siyasi təsirlərdən uzaq qalması prinsipinə ziddir.
Bununla yanaşı, “müstəqil beynəlxalq jurnalistikanın qəsdən məhdudlaşdırılması və çoxsaylı jurnalistin həyatını itirməsi” faktına diqqət çəkilərək, mətbuat azadlığının ciddi şəkildə pozulmasından dərin narahatlıq ifadə olunub.
Mübahisələr davam edir
Son aylarda İsrailin Eurovision-a qatılması məsələsi Avropa ölkələri arasında geniş müzakirələrə səbəb olub. Bir sıra ölkələr hesab edir ki, Qəzzadakı hərbi əməliyyatlar fonunda İsrailin müsabiqəyə buraxılması onun “siyasi platformaya çevrilməsinə” yol aça bilər.
