Hizbullahdan Papaya məktub: Livanın suverenliyi və birgəyaşayış vurğulandı
Hizbullah dünya katoliklərinin ruhani lideri, Papa XIV Leoya məktub ünvanlayaraq onun Livana səfərini alqışladığını bildirib. Təşkilat qeyd edib ki, Livan öz coğrafi mövqeyi və dini-ictimai müxtəlifliyi ilə unikal bir modeldir və bu müxtəliflik ölkənin siyasi sabitliyinin əsas dayaqlarından biridir.
- Hizbullahdan Papaya məktub: Livanın suverenliyi və birgəyaşayış vurğulandı
- “Dünyadakı qarşıdurmalar başqalarının hüquqlarını tanımamaqdan qaynaqlanır”
- Qəzza: “İki ildir davam edən faciə və beynəlxalq sistemin iflası”
- Livanla bağlı narahatlıq: “İşğal və sərvətlərə iddia davam edir”
- “Livanın müdafiəsi ordu–xalq–müqavimət birliyi ilə mümkündür”
- “Sizin mövqeyinizə ümid edirik, Qəzza və Livan zülmə məruz qalır”
Məktubda mərhum Papa II İoann Pavelin “Livan təkcə bir ölkə deyil, həm də bir mesajdır” sözləri xatırladılaraq bildirilib ki, ölkənin çoxkonfessiyalı strukturu xristianlıq və islam arasında, həmçinin müxtəlif mədəniyyətlər və dünyəvi düşüncə tərzləri arasında körpü rolunu oynayır.
Hizbullah vurğulayıb ki, insan amili bütün ilahi dinlərin və hətta dünyəvi ideologiyaların mərkəzində dayanır. Bu isə sülhün və dayanıqlı sabitliyin mümkünlüyü üçün əsas ümid mənbəyidir.
“Dünyadakı qarşıdurmalar başqalarının hüquqlarını tanımamaqdan qaynaqlanır”
Məktubda dünyanın müxtəlif bölgələrində baş verən münaqişələrin mahiyyətinə toxunularaq qeyd olunub ki, bir çox güclər başqalarının hüquqlarını tanımaqdan imtina edir. Bu isə təcavüz, hegemonluq, nəzarət və zorakılıq meyillərini gücləndirir, ədaləti gücün məntiqinə qurban verir.
Hizbullah dünyada insan hüquqlarına hörmətin azalmasının dövlətlər və təşkilatlar səviyyəsində ciddi təhlükə yaratdığını vurğulayıb.
Qəzza: “İki ildir davam edən faciə və beynəlxalq sistemin iflası”
Hizbullah məktubunda Qəzzada son iki il ərzində baş verən faciələri xüsusi qeyd edərək, İsrailin fələstinlilərə qarşı davamlı əməliyyatlarını “açıq-aşkar soyqırımı” adlandırıb. Bildirilib ki, Qəzzadakı vəziyyət İsrailin ardıcıl hücumları və xalqın öz müqəddəratını təyin etmək haqqının tapdanmasının nəticəsidir.
Təşkilat əlavə edib ki, beynəlxalq sistem bu münaqişədə ədalət meyarını tətbiq etməkdə acizdir və nəticədə işğalçı güc ilə öz torpağını müdafiə edən xalq arasında bərabərsiz yanaşma davam edir.
Livanla bağlı narahatlıq: “İşğal və sərvətlərə iddia davam edir”
Hizbullah Livanın cənubunda hələ də davam edən İsrail təhdidlərinə, təkrarlanan hava və quru hücumlarına diqqət çəkib. Təşkilat vurğulayıb ki, İsrail ölkənin su, torpaq və qaz ehtiyatlarına sahiblənmək, bölgəyə siyasi-əmniyyət baxımından məhdudiyyətsiz şərtlər qəbul etdirmək niyyətindədir.
Məktubda həmçinin qeyd olunub ki, İsrailə geniş beynəlxalq dəstək verən böyük dövlətlər regionun sərvətlərinə sahib olmaq üçün bu təcavüzü görməməzliyə vurur.
“Livanın müdafiəsi ordu–xalq–müqavimət birliyi ilə mümkündür”
Hizbullah Papaya ünvanladığı mesajda Livanda birgəyaşayış modelini, konsensuslu demokratik sistemi və daxili sabitliyi qorumağın vacibliyini vurğulayıb. Təşkilat ölkənin suverenliyinə və qərarvermə azadlığına müdaxilə cəhdlərinin qəbuledilməz olduğunu bildirib.
Eyni zamanda, Hizbullahın ordunu və xalqı dəstəkləməkdəki rolu xatırladılaraq bildirilib ki, Livan ərazisinə edilə biləcək hər hansı təcavüzə qarşı mövqeləri dəyişməzdir.
“Sizin mövqeyinizə ümid edirik, Qəzza və Livan zülmə məruz qalır”
Məktubun son hissəsində deyilir:
“Əgər bizim inancımız İsa Məsihə tabe olanların sevgi və insan haqlarının müdafiəçiləri olduğunu təsdiqləyirsə, biz də zülmə və təcavüzə qarşı mövqeyinizə böyük ümid bəsləyirik.”
Hizbullah Papa XIV Leonun Livana səfərinin bütün xalq üçün əhəmiyyətli olduğunu vurğulayaraq ona təhlükəsiz və rahat ziyarət arzulayıb və dünyanın bütün məzlumları üçün ədalət, sülh və rifah diləyib.
