Hikmət Hacıyev: İranla diplomatik gərginlik aradan qalxıb
Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev “EU Today” nəşrinə verdiyi müsahibədə ölkəsinin İranla münasibətlərini şərh edərək bildirib ki, Bakı İranı həm qonşu, həm də konstruktiv tərəfdaş kimi görür.
Onun sözlərinə görə, iki ölkə arasında iqtisadi və ticarət əməkdaşlığının genişləndirilməsi ölkənin hazırkı xarici siyasət prioritetlərindən biridir.
Hacıyev vurğulayıb ki, Azərbaycanın Tehrandakı səfirliyinə edilən silahlı hücum ətrafında yaranmış diplomatik gərginlik artıq tam şəkildə aradan qalxıb:
“Hücum edən şəxs İran qanunları əsasında mühakimə olunub və biz bu səhifəni bağlamışıq.”
“Prezident İlham Əliyev və Prezident Pezeşkianın münasibətləri çox yaxşıdır”
Prezidentin köməkçisi iki ölkə rəhbərləri – Prezident İlham Əliyev və Prezident Məsud Pezeşkian arasındakı şəxsi münasibətlərin son dərəcə müsbət olduğunu vurğulayıb. O bildirib ki, bu qarşılıqlı siyasi etimad Bakı–Tehran əməkdaşlığının davamlı inkişafı üçün mühüm amildir.
Araz çayı üzərində yeni körpü 2025-də tamamlanacaq
Hacıyev müsahibəsində Azərbaycanın regional nəqliyyat layihələrində İranın mühüm yer tutduğunu da qeyd edib. Onun sözlərinə görə, Araz çayı üzərindən keçən Ağbənd–Kelalə avtomobil körpüsü iki ölkənin genişlənən əlaqə planlarında strateji əhəmiyyət daşıyır.
“Körpünün inşası 2025-ci ilin sonunadək struktur baxımından yekunlaşacaq. Sərhəd və gömrük infrastrukturunun işə başlaması isə 2026-cı ilin əvvəlində gözlənilir,” – deyə o əlavə edib.
Bakı–Tehran əməkdaşlığının yeni mərhələsi
Ekspertlər hesab edir ki, Azərbaycan–İran münasibətlərində son aylarda müşahidə olunan müsbət dinamika həm regional nəqliyyata, həm iqtisadi inteqrasiyaya, həm də enerji sahəsində əməkdaşlığa yeni perspektivlər açır. Hacıyevin açıqlamaları isə iki ölkənin qarşılıqlı diplomatik etimadı bərpa etmək istiqamətində irəliləyiş əldə etdiyini göstərir.
