HƏMAS-dan rəsmi açıqlama
HƏMAS hərəkatı silahlı qanadı olan İzzəddin əl-Qəssam Briqadalarının komandirlərindən biri Raid Səədin sionist rejimin hava hücumu nəticəsində həlak olduğunu rəsmən təsdiqləyib. HƏMAS-ın Siyasi Bürosunun üzvü Xəlil əl-Həyyə verdiyi açıqlamada Raid Səədin (Əbu Muaz) sionist rejim hücumu zamanı yanında olan şəxslərlə birlikdə şəhid olduğunu bildirib.
Əl-Həyyə qeyd edib ki, Fələstin xalqı İsrailin davam edən hücumları və Qəzza zolağında həyata keçirilən soyqırım siyasəti səbəbindən son dərəcə ağır və ağrılı günlər yaşayır. Onun sözlərinə görə, sionist rejimin intensiv bombardmanları nəticəsində indiyədək 70 mindən çox insan həyatını itirib və son qurbanlardan biri də Qəssam Briqadalarının komandirlərindən Raid Səəd olub.
“İşğala qarşı onilliklər boyu mübarizə aparıb”
HƏMAS rəsmisi Raid Səədi onilliklər ərzində İsrail işğalına qarşı mübarizə aparan, iradəsi heç vaxt sarsılmayan və sona qədər dirəniş göstərən bir döyüşçü kimi xarakterizə edib. Əl-Həyyənin sözlərinə görə, Səəd bütün fəaliyyəti boyunca müqavimət xəttinə sadiq qalıb və heç vaxt geri çəkilməyib.
Raid Səəd İzzəddin əl-Qəssam Briqadalarının ən tanınmış və tarixi liderlərindən biri hesab olunurdu. O, hərəkatın hərbi strukturunda 20 ildən artıq müddət ərzində mühüm vəzifələrdə çalışıb və əsas qərarların qəbulunda həlledici rol oynayıb.
Qəssam Briqadalarında mühüm fiqur
Məlumata görə, Raid Səəd 2000-ci ildə İkinci Fələstin İntifadasının başlaması ilə silahlı qrupların təşkilatlanması və strukturlaşdırılması prosesində fəal iştirak edib. O, 2003-cü ildən etibarən Qəssam Briqadalarının Hərbi Şurasının üzvü olub və briqadaların baş komandanı Məhəmməd Deyf ilə yaxın əlaqələri ilə tanınıb.
Səəd daha əvvəl də İsrail tərəfindən bir neçə dəfə sui-qəsd cəhdinə məruz qalıb, lakin həmin hücumlardan sağ çıxıb. Bu səbəbdən o, uzun müddət İsrailin hədəf siyahısında olan əsas fiqurlardan biri sayılırdı.
Atəşkəsin pozulması və hücumun detalları
Xatırladaq ki, sionist rejim dekabrın 13-də atəşkəs razılaşmasını pozaraq Qəzza şəhərinin qərbində bir avtomobili hədəfə alan hava zərbəsi endirib. Hücum nəticəsində 4 fələstinli həyatını itirib. İsrail ordusu açıqlamasında zərbənin HƏMAS-ın yüksək vəzifəli üzvlərindən biri olan Raid Səədi hədəf aldığını bildirmişdi.
HƏMAS-ın son bəyanatı İsrailin bu iddiasını faktiki olaraq təsdiqləyib. Hadisə Qəzza zolağında atəşkəsin real vəziyyətdə pozulduğunu və bölgədə gərginliyin yenidən artdığını göstərir.
