Qəzzada dərinləşən humanitar böhran
HƏMAS-ın sözçüsü Hazim Qasım Qəzza zolağında gözlənilən yeni hava dalğasının ağır nəticələr doğuracağını bildirib. Onun sözlərinə görə, hazırda istifadə olunan çadırlar nə güclü yağışa, nə də qışın sərt soyuğuna tab gətirə bilir. Üstəlik, işğalçı tərəfin yanacağın bölgəyə daxil olmasına qoyduğu məhdudiyyətlər vəziyyəti daha da ağırlaşdırır.
Qasım vurğulayıb ki, sektorun fəlakətli humanitar mənzərəsi “təcili və genişmiqyaslı yardım əməliyyatının başlanmasını, real və ləyaqətli sığınacaq məkanlarının təmin edilməsini” zəruri edir.
Humanitar protokolların icrasına çağırış
HƏMAS rəsmisi işğalçı tərəfin 2025-ci ilin yanvar və oktyabr aylarında təsdiqlənmiş humanitar yardım protokollarına əməl etməsinin vacibliyini xatırladıb. Onun sözlərinə görə, Qəzza xalqı müxtəlif vasitələrlə davam edən “sistemli məhvetmə siyasətinin” hədəfindədir — sığınacaq vasitələrinin qarşısının alınması, yardımın məhdudlaşdırılması və keçid məntəqələrinin bağlanması bu siyasətin tərkib hissəsidir. Bu vəziyyət beynəlxalq ictimaiyyəti həm mənəvi, həm də siyasi məsuliyyət qarşısında qoyur.
Qasırğa çadırları yuyub aparır
Gecə saatlarında “Beyron” qütb mənşəli hava kütləsinin bölgəyə daxil olması nəticəsində yağış suları Qəzzadakı çoxsaylı çadırları basıb. Soyuq hava şəraiti və sığınacaq çatışmazlığı bir çox ailəni yenidən evsiz qoyub.
Qəzza Mülki Müdafiə İdarəsinin sözçüsü Mahmud Bəsil bildirib ki, hava şəraitinin təsirləri “sektorun hazırkı vəziyyəti fonunda son dərəcə ağır olacaq”. Onun sözlərinə görə, minlərlə insanın həlak olduğu müharibənin ardınca həyatın bütün sahələrində tam çökmə müşahidə olunur.
Bəsil qeyd edib ki, aşağı ərazilərdə yerləşən çadır şəhərcikləri tamamilə su altında qala bilər və yağış sularının qarşısını almaq mümkün olmayacaq. Bu səbəbdən binalar və sığınacaqlar üçün ciddi çökmə və dağıntı riski mövcuddur.
“Yağış və soyuq yeni fəlakət dalğası gətirir”
O, əlavə edib ki, “müharibənin dağıdıcılığı qismən səngisə də, bölgə bu dəfə sel, soyuq və torpaq sürüşmələri ilə üz-üzə qalıb”. Bəsil beynəlxalq təşkilatları Qəzzaya kərvan evlərinin (konteyner tipli yaşayış modullarının) daxil edilməsinə kömək göstərməyə, onların insanı şəraitə uyğun yerləşdirilməsi üçün təcili infrastruktur qurmağa çağırıb.
