HƏMAS: İsrail razılaşma müddəalarını pozmağa çalışır
Fələstinin HƏMAS hərəkatının sözçüsü Hazim Qasim İsrailin Qəzza ilə bağlı əldə olunan razılaşmada tarixləri, siyahıları və prosedurları manipulyasiya etməyə çalışdığını bildirib. O qeyd edib ki, bu addımlar baş nazir Benyamin Netanyahunun “prosesə nəzarət edən lider” imici formalaşdırmaq cəhdidir.
Qasim bildirib ki, HƏMAS vasitəçilərlə daimi təmasdadır və İsrailin razılaşmanı həyata keçirməyə məcbur edilməsi üçün ciddi səylər göstərilir.
“Əsas məqsəd müharibənin tam dayanmasıdır”
HƏMAS sözçüsünün sözlərinə görə, təşkilat bütün danışıqlar turlarında müharibənin dayandırılmasını əsas şərt kimi irəli sürüb:
“Heç bir əsir mübadiləsi mərhələsi hücumların və müharibənin tam dayandırılacağına dair açıq təminat olmadan müzakirə edilməyib.”
Qasim əlavə edib ki, hazırkı razılaşma Qəzzaya qarşı iki ildən artıq davam edən müharibənin sonunu ifadə edir. Onun sözlərinə görə, İsrail bu müddət ərzində minlərlə insanın ölümünə və yaralanmasına səbəb olan soyqırım həyata keçirib, lakin fələstinlilər bütün ağrı və dağıntılara baxmayaraq müqavimətdən dönməyiblər.
İsrail “yayındırma taktikası” ilə vaxt udmağa çalışır
Qasim qeyd edib ki, əsir mübadiləsi prosesinin yaxın günlərdə başlayacağı gözlənilir. Lakin bu mərhələnin İsrailin HƏMAS-ın təqdim etdiyi siyahıları təsdiqləməsindən sonra icra olunacağını vurğulayıb.
O, İsrailin hələ də Qəzzadan tam çıxmaq və fələstinli məhbusların siyahısını qəbul etmək məsələlərində oyalama taktikası tətbiq etdiyini, bunun isə “fələstinlilərin mənəviyyatını sarsıtmağa yönəlmiş son cəhdlər” olduğunu bildirib.
Qasim beynəlxalq tərəfləri razılaşmanın icrasına nəzarət etməyə və İsraili üzərinə düşən öhdəlikləri yerinə yetirməyə məcbur etməyə çağırıb.
