“Haaretz”: Geri çəkilmə əmri yoxdur
İsrailin “Haaretz” qəzeti təhlükəsizlik mənbələrinə istinadən yazıb ki, İsrail ordusu indiyədək Livanın heç bir bölgəsindən geri çəkilmək barədə rəsmi göstəriş almayıb.
Qəzetin məlumatına görə, İsrail ordusu hazırda Qərbi Zutar bölgəsində yerləşməsə də, siyasi və hərbi rəhbərlik həmin ərazidən geri çəkilməni ümumi çıxış planının tərkib hissəsi kimi təqdim edir.
ABŞ Livan qüvvələrinin hazırlanmasını təklif edib
İsrailin İctimai Yayım Korporasiyasının məlumatına əsasən, ABŞ silahsızlaşdırılmış zonalarda İsrail ordusunu əvəz edəcək Livan qüvvələrinin hazırlanmasını nəzərdə tutan təşəbbüslə çıxış edib.
Məlumata görə, məqsəd həmin ərazilərdə təhlükəsizliyin Livan qüvvələri tərəfindən təmin edilməsidir.
Razılaşmanın məxfi təhlükəsizlik əlavəsi var
İsrailin “Kanal 12” telekanalı xəbər verib ki, Livan və İsrail arasında imzalanan, ABŞ Dövlət Departamentinin dərc etdiyi razılaşmaya məxfi təhlükəsizlik əlavəsi daxil edilib.
Telekanalın iddiasına görə, əlavənin ictimaiyyətə açıqlanmaması Livan hökumətinin tələbi ilə bağlıdır.
Məlumatda qeyd olunur ki, razılaşmaya əsasən, tərəflərin atacağı addımlar əvvəlcədən müəyyən edilmiş vaxt cədvəlinə deyil, sahədə formalaşacaq vəziyyətə uyğun həyata keçiriləcək. Bu isə geri çəkilmənin avtomatik olmayacağı və prosesin konkret şərtlərdən asılı qalacağı anlamına gəlir.
İsrail mediası uzunmüddətli hərbi mövcudluqdan yazır
İsrailin “Kanal 14” telekanalı isə təhlükəsizlik qurumlarının Livanda uzun illər davam edə biləcək hərbi mövcudluğa hazırlaşdığını iddia edib.
Xatırladaq ki, ABŞ ötən həftə Livan və İsrail arasında “çərçivə razılaşması” əldə olunduğunu açıqlamışdı. İsrailin baş naziri Benyamin Netanyahu bunu mühüm nailiyyət kimi qiymətləndirsə də, İsrail ordusunun Livanın cənubundakı mövcudluğunun davam edəcəyini bildirmişdi.
Digər tərəfdən, bu razılaşma Livanda geniş etirazlarla qarşılanıb. Müxtəlif siyasi qüvvələr, ictimai xadimlər və vətəndaş qrupları sənədə qarşı olduqlarını bəyan ediblər.
