İsrail dərin strateji yanlışlıq içindədir
İsrailin ehtiyatda olan general-mayoru İsxak Brik etiraf edib ki, ölkə Hizbullah və HƏMAS-ın hərbi, siyasi və təşkilati baxımdan yenidən toparlanma qabiliyyətini dərin şəkildə yanlış dəyərləndirir. Brik bu fikirləri İsrailin “Haaretz” qəzetində dərc olunan məqaləsində ifadə edib.
Onun sözlərinə görə, İranın intensiv maliyyə və hərbi yatırımları, eləcə də Qətər və Türkiyənin Qəzza zolağında genişmiqyaslı fəaliyyəti münaqişənin ortasında belə bu qüvvələrin siyasi və iqtisadi baxımdan yenidən güclənməsinə şərait yaradır. Brik qeyd edir ki, bu dəstək silahlı qruplaşmalar üçün faktiki olaraq “sığorta polisi” rolunu oynayır və müharibədən sonrakı mərhələdə də onların mövcudluğunu təmin edir.
“İradəli korluq” problemi
General vurğulayır ki, İsrailin həm siyasi, həm də hərbi rəhbərliyi “iradəli korluq” adlandırıla biləcək bir vəziyyət yaşayır. Onun fikrincə, ani və taktiki uğurların cəmiyyətə təqdim edilməsi istəyi mürəkkəb, ziddiyyətli və problemlərlə dolu strateji reallığın açıq şəkildə etiraf edilməsini kölgədə qoyur.
Brik xəbərdarlıq edir ki, düşüncə sistemində köklü dəyişiklik baş verməzsə, İsrail yenidən böyük bir sürprizlə, hətta geri dönüşü olmayan nöqtə ilə üz-üzə qala bilər. O bildirir ki, təhlükəsizlik dünən vurulan zərbənin gücü ilə deyil, sabah düşmənin yenidən güc toplamasının qarşısını almaq bacarığı ilə ölçülür.
Əməliyyat uğurları strateji dönüş deyil
Məqalədə qeyd olunur ki, əməliyyat səviyyəsində əldə edilən uğurlar, nə qədər ağrılı olsa da, mütləq strateji dəyişiklik demək deyil. Brikə görə, cəmiyyət yüksək rütbəli komandirlərin zərərsizləşdirilməsini və ya infrastrukturun dağıdılmasını “son nöqtə” kimi qəbul etməyə öyrəşib. Halbuki bunlar çox vaxt uzunmüddətli eniş prosesində yalnız müvəqqəti düzəlişlərdir.
General hesab edir ki, əsas struktur problem düşmənin səssiz, lakin sistemli şəkildə yenidən qurulma və bərpa imkanlarının nəzərə alınmamasından qaynaqlanır.
Dövlət təhlükəsizliyində davamlı geriləmə
Brik Çinin bölgəyə fəal oyunçu kimi daxil olmasının, xüsusilə İranın raket sistemlərinin bərpasında rolunun, oyunun qaydalarını dəyişdirdiyini vurğulayır. Onun sözlərinə görə, bu proses “müqavimət oxu” adlandırılan bloka texnoloji və logistika baxımından dərinlik qazandırır və İsrailin bunu yalnız hərbi vasitələrlə neytrallaşdırmasını çətinləşdirir.
Eyni zamanda, Türkiyənin rolunun artması və ABŞ-ın Tramp administrasiyası dövründə Qətər və Ankara ilə yaxınlaşması İsrailin Vaşinqtondakı xüsusi mövqeyinin zəiflədiyini göstərir. Digər ölkələrə F-35 qırıcılarının və nüvə texnologiyalarının satışına razılıq verilməsi isə regional silahlanma yarışını sürətləndirərək İsrail ordusunun keyfiyyət üstünlüyünü risk altına alır.
Brikin qənaətinə görə, İsraildə ümumi tendensiya dövlət təhlükəsizliyinin davamlı şəkildə zəifləməsidir və bu mənfi proseslərin təsiri müvəqqəti hərbi nailiyyətləri artıq üstələməyə başlayıb.
