Həmas: İsrail Qəzzada girov saxladığı 1468 fələstinlinin siyahısını təqdim edib
Həmas İsrailin Qəzza zolağında həyata keçirdiyi hücumlar zamanı girov götürdüyü 1468 fələstinlinin adlarının yer aldığı siyahını rəsmi şəkildə təhvil aldığını bəyan edib. Hərəkatın açıqlamasında vurğulanıb ki, sənəd atəşkəs və əsir mübadiləsi razılaşması çərçivəsində vasitəçilərin iştirakı ilə bir aydan çox davam edən danışıqlar nəticəsində təqdim olunub.
Siyahının araşdırılması davam edir
Açıqlamada bildirilib ki, Həmas siyahını müvafiq qurumlarla birlikdə incələməyə başlayıb. Verilən məlumata görə, sənəddəki adların hamısı – 11 nəfər istisna olmaqla – təsdiqlənib. Təsdiqlənməyən 11 nəfərlə bağlı araşdırmalar isə hələ də aparılır.
Həmas: Uyğunsuzluqlara görə məsuliyyət İsrailin üzərindədir
Həmas vurğulayıb ki, siyahıda hər hansı qeyri-dəqiqlik, gecikmə və ya manipulyasiya üçün məsuliyyət tam şəkildə İsrailin üzərinə düşür. Hərəkat ilk dəfə belə bir siyahının rəsmi kanallarla təqdim olunduğunu qeyd edərək gecikmənin səbəbini İsrail tərəfinin “vaxt udmaq və bəzi adlar üzərində dəyişiklik aparmaq cəhdləri” ilə əlaqələndirib.
Həmas həmçinin bildirib ki, İsrail hələ də həbsxana və saxlanma mərkəzlərində bəzi fələstinli əsirləri zorla yoxa çıxarmaqda davam edir və bu şəxslərin taleyi barədə məlumat verməkdən imtina edir. Hərəkat həmin şəxslərin aqibətinin müəyyənləşdirilməsi istiqamətində fəaliyyətini davam etdirir.
Atəşkəs və əsir mübadiləsi prosesinin son durumu
Xatırladaq ki, ABŞ Prezidenti Donald Tramp 9 oktyabrda Misirdə aparılan danışıqlarda İsrail və Həmasın Qəzzada atəşkəs planının ilk mərhələsini təsdiqlədiyini açıqlamışdı. Saziş İsrail hökumətinin 10 oktyabr tarixli razılığından sonra qüvvəyə minib.
Razılaşma çərçivəsində İsrail ordusu “sarı xətt”dən geri çəkilmiş və həmin gün saat 12:00-da Qəzza zolağında atəşkəs tətbiq olunmuşdu. Bununla belə, İsrail ordusu müxtəlif iddialar irəli sürərək Qəzzada ara-sıra hücumlar törətməkdə davam edir.
