Handala qrupundan yeni kiberhücum: İsrailin nüvə tədqiqat mərkəzi hədəfə alındı
Pro-Fələstin mövqeyi ilə tanınan Hənzələ haker qrupu İsrailin nüvə tədqiqat infrastrukturuna sızdığını açıqlayıb. Qrup şənbə günü yaydığı bəyanatda hücumun Sorek Nüvə Tədqiqat Mərkəzini hədəf aldığını və tanınmış israilli nüvə alimi İsaak Gertzin geniş şəxsi məlumat bazasını əldə etdiyini bildirib.
Məlumata görə, qrup Gertzin şəxsi profilini, təhsil tarixçəsini, həmçinin onun Sorek və Saraf obyektləri ilə bağlı iş və ev ünvanlarını ələ keçirib.
“Alimə çiçək dəstəsi göndərdik”
Hənzələ qrupunun iddiasına görə, hücum yalnız kiber-sızma ilə məhdudlaşmayıb. Qrup Gertzin avtomobilinin baqajına “Handala Truth Seekers Popular Resistance Front (HPR)” imzası ilə çiçək dəstəsi qoyulduğunu bildirib. Bu addım qrupun həm fiziki, həm də virtual təhlükəsizlik baryerlərini aşa bildiyini nümayiş etdirmək məqsədi daşıdığı vurğulanıb.
Qrup eyni zamanda daha əvvəl vəd etdiyi mükafatın ilk 10 min dollarlıq hissəsinin ödənildiyini açıqlayıb, lakin detallara varmayıb.
Fəxrizadənin qətli ilə eyni tarixə təsadüf edir
Bu hadisə, 27 noyabr 2020-ci ildə Tehranın yaxınlığında qətlə yetirilmiş iranlı nüvə alimi Möhsün Fəxrizadənin ildönümündən bir gün sonra baş verib. Hənzələ hadisənin təsadüfi olmadığını ifadə edərək gələcəkdə “qeyri-adi addımların” da mümkün ola biləcəyini qeyd edib.
Bouketin necə yerləşdirildiyi məlum deyil
Gertzin avtomobilinə çiçək dəstəsinin necə qoyulduğu hələlik aydın deyil. Bu iddia İsrail nüvə obyektlərinin fiziki təhlükəsizliyi ilə bağlı ciddi suallar yaradıb.
Hənzələnin əvvəlki hücumları
Hənzələ qrupu daha əvvəl də İsrail hökuməti və hərbi strukturlarını hədəf alan bir sıra kiberhücumlarla gündəmə gəlib. Qrupun fəaliyyətinə aşağıdakılar daxildir:
-
gizli hərbi məlumatların sızdırılması,
-
diplomatik yazışmaların ələ keçirilməsi,
-
israilli siyasətçilərin hesablarının hack edilməsi,
-
rəsmi saytlara kütləvi hücumlar.
Ötən ilin aprelində Hənzələ hakerləri İsrail ordusunun radar sistemlərinə sızdıqlarını və Dəmir Qübbə hava hücumundan müdafiə sisteminin fəaliyyətini şəbəkə hücumu ilə pozduqlarını iddia etmişdilər. Qrup bu iddianı radar sistemlərinin hack edildiyini göstərən görüntülərlə əsaslandırmışdı.
Hənzələnin son hücumu İsrailin kritik elmi və hərbi infrastrukturlarının kibertəhlükəsizlik baxımından ciddi risklərlə üzləşdiyini bir daha gündəmə gətirib.
