Həmas: “İsrail müqavimətin şərtlərinə tabe oldu”
Həmas hərəkatı bu gün açıqlama yayaraq Qəzzada müqavimət qüvvələrinin saxladığı 20 israilli əsirin azad edilməsinə başlandığını bəyan edib. Bu addım ABŞ Prezidenti Donald Trampın təşəbbüsü ilə hazırlanan atəşkəs və mübadilə planının birinci mərhələsi çərçivəsində həyata keçirilir.
Hərəkatın rəsmi bəyanatında vurğulanır ki, Həmas öz öhdəliklərini yerinə yetirir və eyni zamanda vasitəçilərin — Misir, Qətər və ABŞ nümayəndələrinin — İsrailin də razılaşma çərçivəsində üzərinə düşən məsuliyyətləri yerinə yetirməsi üçün səylərini artırmasının vacibliyini qeyd edib.
“İsrail iki il ərzində güc yolu ilə uğur qazana bilmədi”
Həmas bəyan edib ki, İsrail hökuməti və ordusu iki il ərzində Qəzzada apardığı hərbi əməliyyatlarla əsirlərini güc yolu ilə azad edə bilmədi və nəticədə müqavimətin şərtlərinə tabe olmaq məcburiyyətində qaldı.
Açıqlamada deyilir:
“Müqavimət dəfələrlə bildirib ki, İsrail əsgərlərinin geri qayıtmasının yeganə yolu mübadilə razılaşmasından və soyqırım müharibəsinin dayandırılmasından keçir.”
Həmas əlavə edib ki, bütün çətinliklərə baxmayaraq, müqavimət qüvvələri israilli əsirlərin həyatının qorunması üçün mümkün olan hər şeyi edib. Onların sözlərinə görə, İsrail ordusu və hökuməti dəfələrlə bu əsirləri hədəf alaraq onları aradan qaldırmağa cəhd göstərib.
“Fələstinli əsirlərin azadlığı müqavimətin qələbəsidir”
Açıqlamada qeyd olunub ki, bu mübadilə prosesi təkcə əsirlərin dəyişdirilməsi deyil, həm də fələstinli əsirlərin onillərlə davam edən mübarizəsinin nəticəsidir:
“Əsrə çevrilmiş qəhrəmanlarımızın azad edilməsi, xüsusilə ömürlük həbs cəzası çəkənlərin azadlığı, xalqımızın iradəsinin və müqavimətimizin gücünün göstəricisidir.”
Həmas bəyan edib ki, bu addım “müqavimətin xalqına və əsirlərinə olan sadiqliyinin təzahürüdür” və “azadlıq iradəsini heç bir güc sındıra bilməz”.
Hərəkat “nasistlərin yeni nəsli” adlandırdığı İsrailə qarşı mübarizənin davam edəcəyini bildirərək, fələstinli əsirlərin məsələsinin “xalqın və müqavimətin milli prioriteti olaraq qalacağını” vurğulayıb:
“Sonuncu fələstinli əsir azad olunmayınca xalqımız rahatlıq tapmayacaq və işğal sona çatmayacaq.”
İsrailli və fələstinli əsirlərin mübadiləsi davam edir
Bu gün səhər İsrail mediası 7 israilli əsirin Həmas tərəfindən azad edildiyini və onların artıq Qırmızı Xaç nümayəndələrinə təhvil verildiyini təsdiqləyib. Məlumatlara görə, azad edilən şəxslərin səhhəti yaxşı vəziyyətdədir.
Eyni zamanda, İsrailin “Ofer” həbsxanasında fələstinli əsirlərin azadlığa buraxılması prosesi də sürətləndirilib. İsrail mediası bildirib ki, səhər saatlarından etibarən 2000-dən çox fələstinli əsirin azad edilməsi üçün son hazırlıqlar tamamlanıb.
Atəşkəs razılaşmasının növbəti mərhələsində daha çox əsirin azad olunacağı gözlənilir.
