Dinc dövrdə xidmət müddəti yenidən müəyyən edilib
Gizir və miçmanlar üçün həqiqi hərbi xidmətdə olma müddəti artırılıb. Bu dəyişiklik İlham Əliyevin təsdiqlədiyi “Hərbi xidmətkeçmə haqqında” Əsasnamənin təsdiq edilməsi barədə” və “Hərbi vəzifə və hərbi xidmət haqqında” Azərbaycan Respublikasının qanunlarına edilən dəyişikliklərdə öz əksini tapıb.
Qüvvədə olan qaydalara əsasən, indiyədək bütün gizir və miçmanlar üçün dinc dövrdə həqiqi hərbi xidmətdə olma müddəti 5 il müəyyən edilmişdi. Bu norma “Hərbi xidmətkeçmə haqqında” Əsasnamənin 12-ci maddəsinin “q” bəndinə və “Hərbi vəzifə və hərbi xidmət haqqında” Qanunun 38.1.4-cü maddəsinə əsaslanırdı.
Yeni dəyişikliklərə görə isə hərbi qulluqçu hazırlayan xüsusi təyinatlı orta ixtisas təhsili müəssisələrini bitirmiş, eləcə də xarici ölkələrin analoji orta ixtisas təhsili müəssisələrində təhsil almış gizir və miçmanlar üçün dinc dövrdə həqiqi hərbi xidmətdə olma müddəti 10 il olacaq. Bu qərar onların ixtisaslaşmış peşəkar kadr kimi bilik və bacarıqlarından ölkənin müdafiəsində daha uzun müddət istifadə olunması məqsədi daşıyır.
Qəbul şərtləri və yaş meyarları dəqiqləşdirildi
Qanunvericiliyin əvvəlki redaksiyasında gizirlərin və miçmanların həqiqi hərbi xidmətinə qəbul edilə bilən şəxslər sırasında “40 yaşınadək hərbi vəzifəlilər” ifadəsi yer alırdı. Dəyişiklikdən sonra bu anlayış konkretləşdirilib.
Belə ki, “40 yaşınadək hərbi vəzifəlilər” ifadəsi “hərbi xidmətdə olmağın son yaş həddinə çatmamış ehtiyatda olan gizirlər və miçmanlar, 40 yaşınadək ehtiyatda olan əsgərlər, matroslar və çavuşlar” kimi dəqiqləşdirilib. Bu dəyişiklik qəbul mexanizminin daha aydın və hüquqi baxımdan dəqiq tətbiqini təmin etməyə yönəlib.
Ehtiyatda olmağın yaş hədləri ayrıca müəyyənləşdirildi
Qanunların müvafiq maddələrində əks olunan cədvəllərdə əvvəlcə əsgərlər, matroslar, çavuşlar, gizirlər və miçmanlar üçün ehtiyatda olmağın son yaş hədləri eyni sətirdə göstərilirdi. Yeni dəyişikliklərə əsasən, gizir və miçmanlar üçün ehtiyat yaş hədləri ayrıca sətirdə müəyyən edilib.
Buna görə, birinci dərəcə ehtiyatda olan gizir və miçmanlar üçün yaş həddi 35 yaş, ikinci dərəcə ehtiyatda olanlar üçün 45 yaş, üçüncü dərəcə ehtiyatda olanlar üçün isə 55 yaş olaraq müəyyən edilib.
Hərbi təlim toplanışlarının müddəti artırıldı
Dəyişikliklər ehtiyatda olan hərbi vəzifəlilərin hərbi təlim toplanışlarına çağırılması qaydalarına da şamil olunub. Yeni qaydalara əsasən, birinci dərəcəli ehtiyatda olan hərbi vəzifəlilər hər dəfə 1 ayadək olmaqla, on dəfəyədək hərbi təlim toplanışlarına çağırıla biləcəklər.
Bundan əlavə, müvafiq icra hakimiyyəti orqanının ehtiyatına keçirilmiş hərbi vəzifəlilər isə hər dəfə 2 ayadək olmaqla, beş dəfəyədək hərbi təlim toplanışlarına cəlb ediləcəklər. Bu dəyişikliklərin məqsədi ehtiyat qüvvələrin hazırlıq səviyyəsinin yüksəldilməsi və müdafiə qabiliyyətinin gücləndirilməsidir.
